News From Halgan Net

Subscribe to News From Halgan Net feed
Somali News
Updated: 41 min 41 sec ago

Wasiirka warfaafinta “Uganda waxay naga aqbashay fudueynta Dal-Ku-Galka Uganda”

Wed, 06/07/2017 - 13:09

Kampala, 7 June 2017 – Wasiirka Warfaafinta Soomaaliya Mudane Cabdiraxmaan Cumar Cismaan (Eng. Yarisow) oo maalmahan booqasho ku jooga dalka Uganda ayaa kulan la qaatay Ku-Simaha Wasiirka Arrimaha Gudaha ee Uganda ahna Wasiiru Dowlaha Mr Obiga Kania. Labada mas’uul ayaa ka wada hadlay arrimo dhowr ah sida in Soomaalida loo fududeeyo dal-ku-galka dalka Uganda, sharciyada dal-ku-joogista iyo arrimo kale.

Wasiir Eng. Yarisow ayaa ugu horeyn Wasiirka uga mahadceliyey qaabilaadiisa iyo sida dalka Uganda loogu soo dhoweeyey. Wasiir Yarisow ayaa warbixin kooban ka siiyey Mr Obiga Kania xaalada dalka, iyo horumarka ay dowlada ku tallaabsatay tan iyo 8dii Feberaayo.

Wasiir Obiga Kania ayaa Wasiir Yarisow uga mahadceliyey booqashadiisa, waxuuna shacabka Soomaaliyeed ugu hambalyeeyey doorashadii 8dii February iyo sidii sida nabada laheyd oo ay Madaxdu u kala wareegeen Madaxtinimadii. Wasiir Kania ayaa sheegay in Dowlada Uganda ay diyaar u tahay inay sii xoojiso xiriirka wallaaltinimo ee labada dal.

Wasiir Eng. Yarisow ayaa ka codsaday Wasiir Obiga Kania in Soomaalida loo sahlo oo loo fududeeyo Dal-ku-galka isagoo sheegay in tan iyo intii online laga dhigay dalbashada visaha ay adkaatay helisteeda, iyadoo ardey fara badan oo Jaamicadaha Uganda iska diiwaangeliyey ay ku adkaatay in dal-ku-galkii ay ku helaan waqtigii ay waxbarashadu bilaabaneysey. Sidoo kale Wasiir Yarisow ayaa ka codsaday Wasiir kania in ardeyda Jaamicadaha ka barta Uganda loo fududeeyo sharciyada dal ku joogista (Student Pass). Ugu danbeyntii Wasiir Yarisow ayaa ka codsaday in Soomaalida loo fududeeyo dal ku galka Uganda.

Ugu danbeyntii Wasiir Obiga Kania ayaa sheegay inuu dib u eegis ku sameyn doono oo Soomaalida loo fududeyn doono inay helaan Dal-ku-galka dalka Uganda, isagoo sheegay in Soomaalida ku sugan Uganda ay yihiin dad sharaf iyo karaama leh, bulshada Uganda ay aad u jecelyihiin. Sidoo kale waxuu ballanqaaday in ardeyda loo fududeyn doono student pass.

 

—-DHAMAAD—–

Wasiiiradda cusub oo uu Madaxweynaha Puntland Magcaabay oo La Dhaariyey.[Cod/Masawiro]

Wed, 06/07/2017 - 13:03

Garoowe:-Madaxweynaha Dawladda Puntland Dr. Cabdiweli Maxamed Cali Gaas oo goobjoog ka haa saaka 07 June 2017 munaasimad lagu dhaarinayey  qaar kamida Wasiiradda cusub ee uu dhowaan magcaabay, munaasimada dhaarinta ayaa ka dhacday Qasriga Madaxtooyada Garoowe. Wasiiradda loo dhaariyey xilalka loo igmaday ayaa kala ah Wasiirka Wasaaradda Warfaafinta, Hiddaha iyo Dhaqanka Cabdiraxmaan Barkhad Warsame, Wasiir ku xigeenka Wasaaradda Caafimaadka Cabdifataax Xasan Xuseen (Waloore), Wasiir ku xigeenka Wasaarada Hawlaha Guud Cabdiweli Maxamed Yuusuf iyo Wasiir ku xigeenka Wasaaradda Maaliyadda Cabdisalaan Bashiir Cabdisalaan.

Munaasimada dhaarinta Wasiiradda ayaa waxaa madaxweynaha ku wehelinaayey Gudoomiyaha Maxkamadda Sare Yuusuf Xaaji Nuur iyo saraakiil ka tirsan Madaxtooyadda Dawladda Puntland.

Madaxweynaha dawladda Puntland Dr. Cabdiweli Maxamed Cali Gaas ayaa kadib markii wasiiradda loo dhaariyey xilalkaasi cusub waxa uu kula dardaarmay inay ay shaqadooda si daacad ah u gutaan kana fogaadaan wax walba oo ku keeni kara in  gaabis ku yimaado hawlaha culus ee loo igmaday.

‘’ Waad dharateen oo kitaab ayaad marten, waxaadna u dhaarateen inaad dadka iyo dalkaba si daacad nimo ah ugu shaqaysaan, maanta waa maalin ka duwan maalmaha kale waayo idinkoo sooman ayaad Kitaab marteen, waxaa laydin ka rabaa dhartaa inaad ka soo baxdaan, waxaan filayaa dhammaanteen dhalin yaraatihiin marka laga reebo Wasiir Barkhadle, waxaan rabnaa in dhalinyaradu dalka u shaqeeyaan oo wixii ay soo barteen dalka ugu shaqeeyaan’’. Ayuu yiri Madaxweynaha Puntland.

Sidoo kale Madaxweynaha ayaa kula dardaarmay Wasiirada cusub inay si daacad ah ugu shaqeeeyaan shacabkooda, isla markaana ay markasta ka fekeraan sidii ay u horumarin lahaayeen bulshadooda iyo shaqooyinka baaxadale ee loo igmaday, waxaana uu ku adkeeyey inay had iyo jeer noqdaan kuwo metela shacabkooda, kana shaqeeya siyaasada dawladda.

‘’waxaa ladin ka rabaa idinkoo dhalin yaro ah inaad masuulid weyn isa saartaan, waxaad noqon doontaan kuwo sifiican u shaqeeya oo si daacad ah dalka ugu adeega ayaad noqon doontaan, mustaqbal kan kasii wanaagsana waad sii yeelan kartaan ama waad fashilmi doontaan oo waxaa laydin ku baran doonaa niman waxma tarayaala inaad tihiin, doorashadu idinka ayay idin jirtaa’’ ayuu yiri Madaxweynaha Puntland.

‘’Dawladda nimada iyo wasiir nimadu maha qofku in xafiis keliya ka shaqeeyo waxaa la rabaa inaad siyaasada dawladda ka shaqaysaan, barnaamijka iyo hadafka siyaasadeed ee dawladda inaad fulisaan baa laydin ka rabaa qof walbi dhul iyo degaan buu ka soo jeedaa waxaadna kamid noqon doontaan metelayaasha dawladda, waxaa laydin ka rabaa shaqadiina inaad sifiican u gudataan, xilkiina la wareegtaan, hawl gashaan, hore u socotaan Insha Allah hadii Illahay yidhaahdo’’ ayuu yidhi Madaxweynaha Dawladda Puntland .

Hoos ka dhagayso dardaarankii Madaxweyne Gaas uu siiyey wasiirada la dhaariyey maanta

Halkaan ka Dhagayso Mp3

–DHAMMAAD—

XAFIISKA, WARFAAFINTA, WACYI-GELINTA HIDDAHA IYO DHAQANKA EE MADAXTOOYADDA DAWLADDA PUNTLAND.

Tartanka Qur’aanka ee Gobolka Nugaal oo Lagu dhawaaqay Natiijada Ardaydii Ku guulaysatay Kaalimaha Hore .[Masawiro]

Mon, 06/05/2017 - 17:05

Garoowe:-Tartankaan oo ah mid sanadwalba Bisha Ramadaan loo qabto ardayda  Qur’aanka ka barata Garowe ayaa maantay lagu soo afmeeray Masjidka Al-Huda ee Magaalda garowe . Ardayda maantay lagu dhawaaqay in ay u tartami doonaan tartanka qur’aanka ee heer Puntland ayaa maalmihii la soo dhaafay  waxaa magaalda Garowe uga socda tartan lagu kala reebayo heer kooda aqooneed  iyo Sida ay u Xifdisan yihiin Qur’aanka.

Ardaydaan ayaa ku kala tartamayay heerarka kala duwan ee qur’aanka waxaana ay ka kala socdeen 18 dugsi waxayna dhamaayeen ilaa 95 arday waxaana ugu dan bayntii soo baxay  Ardaydii Kaalimaha 1aad -2aad-3aad  ka galay 30jus/20jus/10jus Iyo 5jus waxaana dhamaan ardaydaani wajiyadooda ka muuqday farxad iyo raynrayn maadaama la gudoon siiyay abaalmarimo kala duwan oo qaali ah.

Xafladaan oo ahayd mid balaaran islamarkaana ay kasoo qayb galeen Xubno kasocda wasaarada Cadaalada /Wasaarada Wabarashada  / Gudoonka Waxbarashada ee gobolka Nugaal / Madaxda Sare ee Mu’asasada Alminhaaj /Gudigii Tartanka /Culima Awdiin/Odayaal Iyo Waliba Marti sharafkaloo badan. Waxaana Xafladda  laga jeedshay khudbado aad muhiim ugu ah ardayda iyo cid walba oo barata Qur’aanka Kariimkaa.

Xafiiska Warbaahinta
Mu’asasada Alminhaaj .

Madaxweynaha Dawladda Puntland oo magacaabay Wasiiro, Wasiiro kuxigeeno iyo Wasiiru dowlayaal cusub

Mon, 06/05/2017 - 16:30

Garoowe:-Madaxweynaha Dawladda Puntland Dr. Cabdiweli Maxamed Cali Gaas ayaa maanta 05 June 2016 Xafiiskiisa kasoo saaray digreeto xeer Madaxweyne Lr. 55 June 05, 2017, digreeto ayaa waxaa lagu magacaabay Wasiiro, Wasiiru Dowleyaal iyo Wasiiro Ku Xigeeno.

Hoos ka Akhriso digreeto Madaxweynaha Dawladda Puntland uu ku magacaabay Wasiir, Wasiiru Dowlayaal iyo Wasiiro ku xigeeno.


M_M_Deeq
Halgan.net

Madaxweynaha Puntland Dr.Gaas oo Ka Tacsiyeeyay Geerida Siyaasi Barkhad Cali Saalax

Mon, 06/05/2017 - 11:23

Boosaaso:-Madaxweynaha Puntland Dr Cabdiweli Maxamed Cali Gaas, ayaa tacsi tiiraanyo leh u diray Ehelkii, Qaraabadii iyo guud ahaan shacabka Puntland ee uu ka baxay Barkhad Cali Saalax oo ka mid ahaa aasaaasayaashii Puntland oo ku geeriyooday Magaaaladda Bosaso ee xarunta Gobolka Bari. Madaxweynaha Puntland Dr Cabdiweli Maxamed Cali Gaas, ayaa Barkhad Cali Saalax ku tilmaamay inuu u ahaa xubin muhiim u ah shacabka Puntland , kana shaqayn jiray nabadda iyo horumarka Puntland, wuxuuna ilaahay uga beryay inuu u naxariisto.

Hoos ka Akhri Tacsida uu diray Madaxweynaha Puntland Dr Cabdiweli Maxamed Cali Gaas

M_M_Deeq
Halgan.net

Barnaamijka Weydii Culimada Sh Maxamuud Xaaji Yusuf.[ Video]

Sun, 06/04/2017 - 21:24

Garoowe:-Sh Maxamuud Xaaji Yusuf oo maantay marti ku ahaa barnaamijka weydii Culimada ee laga dhagaysto Idaacada Qur’aanka kariimkaa Alxikma Lagana daawado TVGA Somnews waana Barmaamij lagu casumo culimada oo ay dadweynuhu su’aalo ku soo gudbiyaan.

Hoos ka Daawo Barmaamijka weydii culimada waxaan marti ku ah Sh Maxamuud Xaaji Yusuf

M_M_Deeq
Halgan.net

Banaanbax lagu taageerayo Madaxda dowladda Federaalka Soomaaliya oo ka dhacay magaalada Muqdisho.[Video]

Sun, 06/04/2017 - 21:23

Muqdisho:-Waxaa maanta ka dhacay magaalada Muqdisho ee caasimada dalka Soomaaliya banaanbax ballaaran oo lagu taageerayo Madaxda Dowladda Federaalka Soomaaliya ka dib waxqabadkodii 100 maalmood oo ka soo wareegtay markii loo doortay hogaanka dowladda Federaalka Soomaaliya. Banaanbaxaan oo ay ka soo qayb galeen Kumanaan qof oo ku nool magaalada Muqdisho ayaa waxaa uu ka dhacay Garoonka Kubada Cagta Banaadir Stadium waxaan ka soo qayb galay Madaxweynaha dowladda Federaalka Soomaaliya Maxamed Cabdullaahi Farmaajo,Ra’iisal Wasaare Xasan Cali Kheyre,wasiirka Arrimaha gudaha Federaalka Cabdi Faarx Juxa, Wasiiro xildhibaano,saraakiil ciidan.

Madaxweyne Dowladda Federaalka ee Soomaaliya Maxamed Cabdullaahi Farmaajo oo la hadlay dadkii ka soo qayb galay banaanbax lagu taageerayo Madaxda dowladda Federaalka Soomaaliya ayaa sheegay in guul lagu gaari karo isku duubni u dhexeysa dowladda iyo shacabka. Madaxweyne Dowladda Federaalka ee Soomaaliya Maxamed Cabdullaahi Farmaajo ayaa xusay in caasimada Soomaaliya ay noqon doonto mid ka qurux badan caasimadaha dalalka Afrika lana arki doono is bedel weyn 4 sano ee xilka hayo.

Ugu danbayntii ayaa Madaxweynaha dowladda Federaalka Soomaaliya wuxuu soo hadal qaaday dagaalka dowladiisa kala dhexeeya ururka Al-shabaab waxaan uu ugu baaqay dhalinyarad ka tirsan ururkaas in ay ku soo biiraan dadkooda iyo dowladooda.

Hoos ka Daawo khudbadii Madaxweynaha DFS Maxamed Cabdullaahi Farmaajo

A/cawaale
Halgan.net

Ra’iisul Wasaareaha JFS Xassan Cali Kheyre oo ka warbixiyey Waxqabadka Dawladda ee mudadii ay jirtay Xukuumadda.[Masawiro]

Sun, 06/04/2017 - 20:56

Muqdisho:-Ra’iisal Wasaaraha Xukuumada Federaalka ah ee Soomaaliya Mduane Xasan Cali Kheyre oo ka qeyb galay bannaan-bax lagu taageerayay 100-kii maalmood ee ay jirtay Dawladda uu Hoggaamiyo Madaxweyne Maxamed C/laahi Farmaajo, ayaa ka hadlay labadii bilood ee ay jirtay Xukuumadda uu hoggaamiyo iyo wax yaabihii u qabsoomay, waxana uu si gaar ah diiradda ugu saaray Midnimada iyo Wadajirka ka dhaxeeya hay’adaha sare ee Qaranka, kalsoonida Shacabka, Dhaqaalaha, Amniga iyo abaarihii ka dhacay dalka.

Ra’iisal Wasaare Xasan Kheyre waxa ugu horeyn uga mahadceliyey shacabka Soomaaliyeed taageerada ay dawladda u hayaan, wuxuna tilmaamay in waajib ay tahay in bisha ramadaan laga wada shaqeeyo danta guud ee dalka iyo dadka, gaar ahaan sugidda amniga, horumarinta caddaaladda, la dagaalanka musuq-maasuqa iyo gar-gaarka dadka danyarta ah.

Mudane Xasan Kheyre ayaa soo hadal qaaday sida ay xukuumadiisa uga go’an tahay in caqabadaha jira looga gudbo iskaashi dhex mara guud ahaan hay’adaha dawladda iyo bulsho weynta Soomaaliyeed.

“Caqabadaha iyo dhibaatooyinka ina horyaala waa kuwa ragaaday, dawladda kaliyana wax kama qaban karto, waxaa loo baahan yahay in dhammaan qeybaha kala duwan ee bulshada doorkooda ka qaataan, gaar ahaan aqoonyahanada, culimada, oday-dhaqameeyada, ururada samafalka, ganacsatada, haweenka iyo dhalinyarada, taas oo looga gudbi karo marka la helo midnimo, wadanino, wadashaqeyn iyo iskaashi dhex-mara dawladda iyo shacabkeeda”

Qorshaha Xukuumadda saldhigga u ah mar uu ka hadlayey Ra’iisul Wasaruhu ayuu tilmamay in ay kamid yihiin:-

1)Kow- ka-guul-gaarista xasiloonida guud ee dalka, gaar ahaan sugidda amniga iyo la dagaalanka nabad-diidka,

2)Labo, dhisidda iyo meel-marinta cadaalad, garsoor hufan, karti, isla xisaabtan, daah-furnaan iyo ciribtirka Musuq-maasuqa.

3)SADDEX- kobcinta dhaqaalaha si loo ballaariyo wax-soo-saarka shaqo abuurka, maalgashiga iyo dib-dhiska kaabayaasha dhaqaalaha kuwaas oo lagama maarmaan u ah la dagaalanka saboolnimada iyo xasiloonida darada dalka.

Ra’iisul Wasaaraha oo ka hadlayay arrimaha abaaraha ayaa yiri:

“Wallow illaahey nooga raayay Abaarihii iyo dhibkii, balse casharka aan ka baranay abaarta, wuxuu na tusayaa haddii aan isku tashano xukuumad iyo shacabba in aan ka hortagi karno aafooyinka abaaruhu keenaan. Anagoo ka duulayna mowqifka ah in aan isku tashano, waxaa noo suurto-galay: In aan gaarsiino deeqaha gurmadka dalka oo dhan, mudadaas abaartu jirta waxaa la qeybiyey lacag dhan shan million oo dollar oo si hufan u gaaray dadka Soomaaliyeed.

Ra’iisul Wasaare Xasan Cali Kheyre ayaa sheegay in la wiiqay mudo kooban argagixisada, isagoona tilmaamay in la xakameeyey qaraxyadii iyo hubkii lagu sitay caasimadda. “Howlgalkii ugu horeeyey ee la fuliyey waxaa lagu qabtay kooxo dhagar-qabayaal ah iyo hub sharci darro ah oo loo adeegsan jiray gumaadka shacabka, waxaan ku guuleysanay in ciidamo badan xeryahoodii lagu celiyo, waxaan kaloo qaadnay jidgooyooyin sharci darro ah”ayuu yiri R.W Kheyre.

Ugu danbeyn, Ra’iisul Wasaaraha ayaa tilmaamay in mudadaa kooban ee ay jirtay Xukuumaddu uu dalku gaaray horumaro la taaban karo haddii ay tahay dhaqaalaha oo sara-u-kacay iyo hannaanka maaliyadda oo dib loo saxay, isla markaana la dardargeliyey kobcinta iyo maareynta ilaha dakhliga, taas oo dhalisay in uu sara u kaco dhakhliga dawladda, laguna guuleystay bixinta mushaarka ciidamada iyo shaqaalaha dawladda.

—-DHAMMAAD—-

Xafiiska Warbaahinta iyo Xiriirka
Muqdisho, Somalia

Madaxweynaha Puntland oo Garoowe ku Qaabilay Qunsulka Dalka Hindiya ee Soomaaliya.[Masawiro]

Fri, 06/02/2017 - 16:23

Garoowe:-Madaxweynaha Dawladda Puntland Dr. Cabdiweli Maxamed Cali Gaas ayaa maanta 02 June 2017 xafiiskiisa kuqaabilay wefti ka socdey safaarada Hindiya ee Soomaaliya oo uu hogaaminayey qunsulka dalka Hindiya ee Soomaaliya Mr Rajesh Swami. Weftigani oo Garoowe soo gaadhay maalinimadii shalay ayaa waxaa garoonka diyaaradaha Kanooko kusoo dhoweeyey Masuuliyiin ka tirsan golaha wasiirada dawladda Puntland iyo saraakiil ka tirsan Madaxtooyada dawladda Puntland, waxaana ay isla maata gelinkii hore kulan kula qateen Madaxtooyada Garoowe wasiiro, wasiir ku-xigeeno iyo saraakiil ka tirsan Madaxtooyada dawladda Puntland.

Kulanka Madaxweynaha iyo qulsulka Dalka Hindiya ee Soomaaliya ayaa waxa ay kagga wadda hadleen arrimo laxidhidha Waxbarashadda, Cafimaadka, Kaluumaysiga, Ganacsiga, iyo xidhiidhka Puntland iyo dalka Hidiya.

Madaxweynaha Dawladda Puntland ayaa ugu horayn ku soo dhoweeyey weftigani Puntland, waxaana uu faahfaahin ka bixiyey xidhiidh soo jireenka ah ee Puntland iyo dalka Hindiya kaas oo ay iska kaashan jireen arrimaha Ganacsiga iyo Waxbarasha, isla markaana waxa uu Madaxweynuhu hoosta ka xariiqay in ay lagama maarmaan tahay in laga warhayo xadhiidhkaasi soo jireenka ah.

Sidoo kale Madaxweynaha Puntland ayaa xusay in dawladda Puntland dhankeeda diyaar u tahay xoojinta iyo adkaynta xidhiidhka wanaagsan ee  Puntland iyo dalka Hindiya ka dhexeeya, waxaana uu xaqiijiyey in dawladda Puntland diyaar u tahay kawadda shaqaynta wax kasta oo ay  ku jiro masiirka shacabka Puntland iyo kan Hindiya.

Dhinnaca kale Qunsulka dalka Hindiya ee Soomaaliya  Mr Rajesh Swami ayaa dhankiisa sheegay ay diyaar u yihiin adkaynta iyo xoojinta xidhiidhka labada dhinac, isla mar’ahaantaana ay xooga saaridoonaan kuna fara adaygi doonaan sii jiritaanka iska garabsiga arrimaha Ganacsiga, Waxbarashada, Kaluumaysiga  iyo Caafimaadka.

Madaxweynaha Dawladda Puntland Dr. Cabdiweli Maxamed Cali Gaas ayaa markasta ku hawlan kobcinta iyo sare u qaadida arrimaha Bulshada sida kaabayaasha dhaqaalaha, waxbarasha, Caafimaadka iyo Biyaha.

–DHAMMAAD—

XAFIISKA, WARFAAFINTA, WACYI-GELINTA, HIDDAHA IYO DHAQANKA EE MADAXTOOYADA DAWLADDA PUNTLAND.

Sarkaal ka tirsanaa Ciidamada Daraawiishta Puntland Oo lagu dhaawacay Gaalkacyo (Dhageyso)

Fri, 06/02/2017 - 01:53

Wararka caawa naga soo gaaraya magaalada Gaalkacyo ee xarunta gobalka Mudug ayaa sheegaya in dhagarqabayaal ka tirsan kooxda Al-Shabaab ay dhaaween sarkaal ka tirsan ciidanka Daraawiishta Puntland oo lagu magacaabo Col. Cabdirisaaq Jaamac Xasan (Xaaji Cariish).

Col. Cabdirisaaq Jaamac Xasan (Xaaji Cariish) ayaa xabaduhu uga dhaceen daanka iyo dhabarka, sida uu sheegay guddoomiyaha gobalka Mudug Xasan Abgaalow oo caawa la hadlay warbaahinta ka howlgasha magaalada Gaalkacyo.

Dhagarqabayaasha weerarka geystay ayaa waxay dhamaayeen 2 dhalinyaro ah waxaana markii uu dhacay weerarka lagu dhaawacay Col. Cabdirisaaq Jaamac Xasan (Xaaji Cariish) ay dadweynahu baacsadeen ragii weerarka geystay waxayna dhaawaceen mid ka mid ah iyaga oo galay dhanka xaafada Wadajir ee Galmudug .

Guddoomiyaha Gobolka Mudug Xasan Abgaalow ayaa sheegay in labadii nin oo mid dhaawac yahay ay gudaha u galeen Xaafadda Wadajir ee Galmudug ka arimiso.

Wararka qaar ayaa sheegaya in mid ka mid dharqabayaasha kooxda Al-Shabaab ee dhaawacay Col. Cabdirisaaq Jaamac Xasan (Xaaji Cariish) oo uu dhaawac gaaray uu u dhinay dhiig bax,

Hoos ka Dhageyso Gudoomiyaha gobalka Mudug oo ka hadlaya weerar caawa lagu dhaawacay
Col. Cabdirisaaq Jaamac Xasan (Xaaji Cariish)

Sound 1

M_M Deeq
Halgan.net

Shirkii Golaha Wasiirada Soomaaliya oo looga hadlay qodobo kala duwan

Thu, 06/01/2017 - 18:37

Golaha Wasiirada ee Xukuumada Federaalka Soomaaliya ayaa maanta yeeshay kulankoodii caadiga ahaa oo uu shir-guddoominayay Ra’iisal Wasaaraha Xukuumada Mudane Xasan Cali Kheyre. kulanka ayaa waxaa warbixino looga dhageystay qaar kamid ah Wasaaradaha iyo Hay’adaha ammaanka.

Ugu horeyn, Golaha ayaa warbixin ka dhageystay Taliyaha Hay’adda Nabad-sugidda iyo Sirdoonka Qaranka, Mudane C/laahi Sanbaloolshe oo ka hadlay howlgallo ay ciidamada amnigu ka sameeyeen Caasimadda inta lagu guda jirey bishan Ramadan, wuxuna tilmaamay in la fashiliyey lana fuliyey qorshe-yaal badan oo cadowgu doonayeen in ay ku qal-qalgeliyaan amniga Muqdisho.

Wasiirka Gargaarka iyo Maareynta masiibooyinka, Marwo Maryam Qaasim ayaa ka warbixisay safaro ay ku tagtay gobollada Bay, Bakool iyo Gedo, waxaana ay sheegtay in dadka gobolladaasi dagan ay ku sugan yihiin xaalad adag, gaar ahaan degmada Waajid oo go’doon ay galiyeen kooxaha Argagixisada una baahan gurmad in loo fidiyo shacabka halkaasi dagan.
Sidoo kale, Wasiirka Arrimaha Dibedda Mudane Yuusuf Garaad ayaa laga dhageystay warbixin ku aadan Qorshaha iyo qaabka wax ka badelka wasaaradda iyo safiirada dibedda u jooga Soomaaliya, wuxuna tilmaamay Wasiirku in loo baahan yahay dib-u habayn in lagu sameeyo qaabka ay u shaqeeyaan safaaradaha dibedda ugu yaalla Soomaaliya, isla markaana la dhaqan geliyo sharcigii arrimiha dibedda ee horey loo ansixiyey.

Ugu danbeyntii Ra’iisul Wasaaraha ayaa Golaha Wasiirada kula dar-daarmay in howlaha muhiimka ah ee horyaala dhaqso loo fuliyo si shacabka Soomaaliyeed ay u gaaraan adeegyada ay u baahan yihiin.

……..Dhamaad…,,,,

Maamulka Gobolka Barri, Taliska ciidamada & Duqa Bosaaso oo soo bandhigay Gaari siday walax qarxa iyo raggii watay.[Cod/Masawiro]

Wed, 05/31/2017 - 10:38

Boosaaso:-Ciidamada amniga magaalada Boosaaso ayaa saaka gacanta ku dhigeen gaari waday walxa qarxa iyo dhalinyardii waday waxaan saaka saxaafadda u soo bandhigay Taliska ciidanka magaalada Boosaaso ee xarunta Gobolka Bari. Gaari waday walxa qarxa ayaa waxaa uu waday agab loogu tala galay in la saaro ilaa saddex gaari si loogu adeegsado qarax waxaan gaari la soo saaran Canbe iyo xayn Ari ah si loo soo dhaafiyo baraha ay Ciidamadu taagan yihiin.

Gudoomiyaha gobalka Barri Yusuf Maxamed Waceys (Dhedo), taliyaha qeybta Booliska ee gobalka Barri G/dhexe Cabdixakiim Yusuf iyo Duqa Boosaaso Yaasiin Mire oo Shir Jaraa’id si wadajir ah u qabteen Boosaaso ayaa waxaa ay ugu baaqay dadweynaha in ay la shaqeeyaan Laamaha amniga iyagoo xusay in gaarigaan uu ka yimid magaalada Gaalkacyo ee xarunta Gobolka Mudug uuna soo maray deegaano badan ilaa lagu qabtay Kontroolka magaalada Boosaaso.

Gudoomiyaha gobalka Barri Yusuf Maxamed Waceys (Dhedo),  ayaa waxaa uu ugu baaqay Madaxda Puntland ugu saraysa in la abaal mariyo ciidamada amniga Koorntoolka Boosaaso ee qabtay qarax la doonayey in lagu laayo shacabka ku nool Boosaaso.

Hoos ka Dhagayso shirka jaraaid oo ay wada qabteen Gudoomiyaha gobalka Barri Yusuf Maxamed Waceys (Dhedo), taliyaha qeybta Booliska ee gobalka Barri  iyo Duqa Boosaaso

Halkaan ka Dhagayso Mp3

A/cawaale
Halgan.net

Kitaab Aasaaska latacaamulka Quraanka Sh Maxamed Cabdi Umal Qeybtii 1aad (Daawo)

Tue, 05/30/2017 - 19:45

Waxaan idiin soo gudbineynaa Kitaab cusub  oo ka halaya Aasaaska latacaamulka Quraanka waxaana akhrinaya Sheekh Maxamed Cabdi Umal Xafidahulaah waxaana uu casharada taxanaha ah diirada lagu saarayaa qiimaha Qu,aanka iyo Aasaaska latacaamulka Quraanka gaar ahaan si guud sigaarana Bishan Ramadaan

Hoos ka Daawo Casharkii koowaad Aasaaska latacaamulka Quraanka Sh Maxamed Cabdi Umal

Halgan.net
Nairobi

Madaxweynaha Puntland, Jubaland Iyo Galmudug oo Si WadaJira Baaq Nabadeed Ugu Diray Shacabka Gobolka Mudug

Tue, 05/30/2017 - 17:23

Madaxweynaha Dawladda Puntland Dr. Cabdiweli Maxamed Cali Gaas, Madaxweynaha Jubaland Axmed Maxamed Islaan iyo Madaxweynaha Galmudug Axmed Ducaale Geelle Xaaf ayaa maanta 30 May 2017 shir Jaraa’id oo ay ku qabteen magaalada Cadaado waxa ay si wadda jira ugu baqeen shacabka labada dhinac ee magaalada Gaalkacayo inay kawadda shaqeeyaan nabada , horumarka, iyo deris wanaaga.

Kahor shirka Jaraa’id ayaa waxay ay lug ku mushaaxeen wadada halbowlaha ah ee magaalada Cadaado halkaasi oo ay si kalsooni leh gacanta ugu haadiyeen shacabka magaaladaasi, waxaana laga dheehanayey wejiyada shacabka kuwo ay soo jidatay ficilka wanaagsan ee ay ku dhaqaaqeen madaxdoodu.

Madaxweynaha Dawladda Puntland Dr. Cabdiweli Maxamed Cali Gaas ayaa sheegay in shacabka gobolka Mudug ay yihiin dad walaalo ah,isla dhashay, derisa, dhuldaaqsimeed waddale, horumar iyo wadda shaqayn buuxdale, waxaana uu ugu baaqay inay kawadda shaqeeyaansidii ay u ilaashan lahaayeen xasiloonida iyo nabada ay maanta ku naaloonayaan.

Sidoo kale Madaxweynaha Puntland ayaa ku baaqay in si degdega loo furo ama loo baneeyo wadooyinka kala xidhan ee magaalada Gaalkacayo si ay ufududaadaan isu socodka dadka walaalaha ah ee wadda degan, waxaana uu sheegay in taasi ay shacabka u horseedayso Isfahan, wadda shaqayn iyo inay dareemaan nasteexada iyo naruurada ay leedahay is garabsiga dadka walaalaha ah.

Dhinaca kale madaxweynaha Puntland ayaa xusay in dhuldaaqsimeedka ka dhexeeya shacabka labada dhinac ee had iyo jeer ka yimaado khilaaf ku ay tahay laga maarmaan in xal laga gaadho,si loo xakameeyo isku dhacyada ka yimaada degaanada daaqsimeedka ah, waxaana uu sidoo kale madaxweynuhu sheegay inay tahay muhiim in gobolka Mudug loo sameeyo ciidan isku dhafa oo ka shaqeeya sugida amniga gobolkaasi.

Madaxweynaha Jubaland Axmed Maxamed Islaan ayaa isna dhankiisa baaq nabadeed u diray shacabka gobolka Mudug waxaana uu sheegay in isir ahaan dadka gobolka mudug ay u dhasheen dad dun wanaagsan oo jecel nabada iyo Soomalinimada, isla markaana had iyo jeer ay ku jirto lexejeclo, damqasho Soomaalinimo iyo nabad Jacayl, waxaana uu ugu baaqay inay kawadda shaqeeyaan horumarka iyo nabada si ay ula baratamaan gobolada kale ee Soomaaliya.

Madaxweynaha Cusub ee Galmudug Axmed Ducaale Geelle (Xaaf) ayaa xusay in shacabka gobolka Mudug ay yihiin dad walalo ah oo xigaala, waxaana uu ugu baaqay inay beri ka noqdaan soo noqnoqoshada colaada gobolkooda, taasi oo uu xusay inay kutahay degaanadooda caqabad iyo masiimo aan xal lahayn maadaama ay ku nafwaayayaan muwaadin Soomaliyeed oo muslina.

Madaxweyne Xaaf ayaa sidoo kale xoojiyey baaqa Madaxweynaha Puntland ee ahaa isufurka magaalada Gaalkacayo, kaasi oo uu sheegay in uu yahay caqada koowaad ee keentay isfahmi waaga shacabka magaaladaasi, waxaana uu sheegay inay dhankooda ka shaqayn doonaan horumarka magaalada Gaalkacayo.

Madaxweynaha Dawladda Puntland Dr. Cabdiweli Maxamed Cali Gaas iyo weftigii balaadhnaa ee Cadaado kaga qayb galay caleemasaarka madaxweynaha cusub ee Galmudug ayaa ugu danbayn maanta gelinkii danbe kusoo laabtay magaalada Garoowe ee caasimada Puntland, waxaana garoonka diyaaradaha Kanooko ee magaalada Garoowe kusoo dhoweeyey masuuliyiin ka tirsan goloyaasha dawladda Puntland iyo saraakiil ka tirsan Madaxtooyada dawladda Puntland.

–DHAMMAAD—

XAFIISKA, WARFAAFINTA, WACYI-GELINTA, HIDDAHA IYO DHAQANKA EE MADAXTOOYADA DAWLADDA PUNTLAND.

Mu’assada Al-Minhaaj ee Gobolka Nugaal oo 190 Qoys Raashin ugu qaybisay magaalada Garoowe.[Masawiro]

Tue, 05/30/2017 - 16:22

Garoowe:-Mu’asasada Alminhaaj Farceeda Gobolka Nugaak Ayaa Maantay oo taariikhdu tahay 29/05/2017 waxay 190 qoys oo dan yar ah raashin ugu qaybisay magaalada Garoowe raashinkaan oo ka koobnaa /Bur/Bariis/Sonkor /Timir Iyo Waliba saliid. Waa Sanadkii 4aad oo sidaan oo kale Mu’asasada Al-Minhaaj Gobalka Nugaal gaarsiiso Raashin Boqolaal Qoys oo aan haysan waxay ku afuraan Mu’asasada ayaa Mashruucaan Balaaran ugu Magacadartay Taakulo (Kiilo Bixi Aan Isku Filaansho Gaarnee) waana Olole dadka wax haysta looga soo aruurinayo raashin ka dibna la gaar siinao dadka aan awoodin in ay helaan waxay ku afuraan .

Ugu horanba goobta ay ka dhacaysay Qabinta Raashinku waxaa warbixin dhinacyo badan taabanaysa ka soo jeedshay Sheekh. Mukhtaar Axmed oo ah Gudoomiyaha Fulinta Al-minhaaj Nugaal waxaana Sheekhu u mahad celiyay Dhamaan dadkii deeqdaan ku deeqay iyo dadkii soo Aruurshay Waxaana uu raacshay In danta ay kaleedahay Mu’asasadu ay tahay in dadku Isku tashadaan oo Isqaataan .

Waxaa isna dhankiisa soo dhaweeyay Mashruucaan balaaran Sheekh. Dalmar Guureeye waxaana uu Minhaaj ku booriyay in ay sii wadaan dadaalkooda ay ay bulshada ku garab taagan yihiin .
Ugu Danbayn waxaa xaflada soo xiray xoghayaha Dowlada Hoose ee Degmada Garowe waxaana uu xusay in Mu’asasadu Kaalinta ay kujirto marna la ilaawi karin waxaana uu balan qaaday in ay sidhow u lashaqaynayaan Mu’asasada Al-Minhaaj ayna ku faraxsan yihiin dadaalkaan balaaran.

Nuur Jaamac Aadan

Xafiiska Warbaahinta
Mu’asasada Al-Minhaaj

Caleema Saarka Madaxweynaha Gal-Mudug Axmed Ducaale Gelle Xaaf [ Dhamaad]

Mon, 05/29/2017 - 15:56

Cadaado:-Waxaa ka socota Magaaladda Cadaado Caleema saarka Madaxweynaha Galmudug Axmed Ducaale geelle Xaaf waxan ka qayb galaya, Madaxweynaha DFS Maxamed Cabdullahi Farmaajo, wasiirka Arrimaha gudaha dowladda Federaalka Soomaaliya Cabdi Faarax Juxa, Madaxweynaha Puntland Dr.Gaas , Madaxweynaha Jubbaland Axmed Madoobe, Madaxweynaha Koonfur Galbeed Shariif Xassan , Madaxweynaha ku xigeenka Hirshabeele Cali Guudlaawe iyo Xubno ka tirsan Beesha Caalamka.

Hoos ka Daawo Caleema Saarka Madaxweynaha Galmudug Axmed Ducaale Gelle Xaaf

A/cawaale
Halgan.net

Wafdi uu hogaaminayo Madaxweynaha dowladda Puntland oo gaaray degmada Cadaado

Mon, 05/29/2017 - 15:22

Cadaado:-Wafdi uu hogaaminayo Madaxweynaha dowladda Puntland Dr.Cabdiwali Maxamed Cali Gaas ayaa goor-dhaweyd gaaray magaalada Cadaado ee xarunta KMG ee Maamulka Galmudug, oo maanta ay ka dhacayso xaflada lagu caleemo saarka madaxweynaha Gal-mudug Axmed Ducaale Geelle Xaaf. Wafdiga Madaxweynaha Puntland ayaa markii uu gaaray degmada Cadaado waxa si diiran ugu soo dhaweeyey Madaxweynaha Gal-Mudug , Axmed Ducaale . wasiirka Arrimaha Gudaha iyo Federaalka Cabdi Faarx Juxa , Wasiiro, Xildhibaano iyo Saraakiil ka tirsan maamulka Gal-mudug.

Dhan kale waxaa magaalada Cadaado gaaray wafdi uu hogaaminayo Madaxwyenaha Jubbaland Axmed Madoobe , Wakiilka gaar ah ee Qaramada Midoobay u qaabilsan arimaha Soomaaliya Mr. Keating iyo safiiro ka socday beesha caalamka.

Amaanka magaalada Cadaado ayaa waxa adkeeyey ciidamo ka tirsan dowladda Federaalka Soomaliya iyo Maamulka Gal-Mudug waxaan ay si dhow ula socdaan dhaqdhaqaaq dadweynaha
waxaan saacadaha soo socda la filayaa in magaalada Cadaado ay gaaraan Madax ka tirsan maamulada ka jira dalka .

A/cawaale
Halgan.net

Shirka Golaha Wasiirrada oo looga hadlay dar-dargelinta Hindise Sharciyeedyada loo gudbinayo Baarlamaanka.[Masawiro]

Mon, 05/29/2017 - 14:49

Muqdisho:-Golaha Wasiirada ee Xukuumada Federaalka Soomaaliya ayaa maanta yeeshay kulan aan caadi aheyn oo uu shir-guddoominayey Ra’iisal Wasaare Ku xigeenka Xukuumada Mudane Mahdi Maxamed Guled (Khadar), iyadoo Ra’iisul Wasaaraha uu ku soo biirey shirka intuu socday oo uu dardaaran u jeediyey Wasiirada. Arrimaha kulanka looga hadlay ayaa ahaa dardargeinta Hindise Sharciyeedyada muhiimka u ah howlaha Dowlada.

Ra’iisul Wasaare ku xigeenka ayaa hoosta ka xariiqay muhiimada dardargelinta shuruucda dalka bacdamaa ay Dawladan tahay tii Sharciga iyo Shacabka, shacabkana ay naga sugayaan waxqabad dhan walba ah.

Golaha ayaa dhageystay warbixino ku aadan shuruucda ay gacanta ku hayaan wasaaradaha qaar si loogu sii diyaar garoobo oo Golaha Wasiirada ay u ansixiyaan ka hor inta aan loo gudbin Baarlamaanka. Wasiirada ayaa sheegay in shuruucda ay diyaariyeen, qaarna ay weli wadaan wadatashi, iyadoo la isku raacay in shuruuc ka badan 20 ay diyaar yihiin, Hindise Sharciyeedyadaas oo ay ka mid yihiin;

1. Isgaarsiinta
2. La Dagaalanka Musuqmaasuqa
3. La-Dagaalanka Argagaxisada
4. Runta & Dib u Heshiisiinta
5. Dawladaha Hoose
6. Dambiyada Kufsiga
7. Muwaadinimada
8. Dadka Baahiyaha Gaarka qaba
9. Kalluumeysiga & Kheyraadka Bada
10. Badda
11. Kheyraadka Biyaha
12. Tamarta
13. Maareynta Maaliyada
14. Istaatiistikada
15. Xeerka Saxaafada
16. Waxbarashada
17. Nidaamka Hay’adaha Samafalka
18. Sharciga Beeraha
19. Gudiga Muftida Culumada

DHAMAAD
Xafiiska Warbaahinta iyo Xiriirka
Muqdisho, Somalia

Ra’iisul Wasaare Khayre oo kulan la qaatay qaar ka mid ah Safiirada Beesha Caalamka.[Masawiro]

Mon, 05/29/2017 - 14:48

Muqdisho:- Ra’iisul Wasaaraha Xukuumada JFS Mudane Xasan Cai Khayre ayaa maanta kulan gaar ah la qaatay Beesha Caalamka oo ujeedadiisu ahaa inuu warbixin ka siiyo xaaladda dalka, isla markaana uu ka codsaday in labada dhinacba ay la yimaadaan isla xisaabtan dhab ah oo dhameystiran.

Kulanka waxaa goob joog ahaa Ergeyga Gaarka ah ee Xoghayaha Guud ee QM, Ergeyga Gaarka ah ee Midowga Afrika, Safiirada Midowga Yurub, UAE, Turkey, Sweden, China, waxaana qadka shaashada ku jirey wakiilo ka socday Mareykanka iyo UK. Ra’iisul Wasaaraha waxaa ku wehliyey kulanka Wasiirada Maaliyada, Qorsheynta, Difaaca, Warfaafinta iyo Wasiiru Dowlaha Xafiiska RW.

Ra’iisul Wasaare Khayre ayaa ugu horreyn warbixin ka siiyey horumarka ay dawladu ku talaabsatay mudadii ay jirtey ee dhanka Gurmadka Abaaraha, Amniga, Dhaqaalaha, La dagaalanka musuqmaasuqa iyo qorsheyaasha guud ee xukuumada. Ra’iisul Wasaaraha ayaa sheegay in Dowlada Federaalka ay bilowday nidaam isla xisaabtan ah oo dhan walba ah kana codsaday beesha caalamka inay iyagana la yimaadaan isla xisaabtan furfuran oo shacabka Soomaaliyeed kalsooni siin kara.

Mas’uuliyiintii beesha caalamka ayaa ugu mahadceliyey Ra’iisul Wasaaraha qabanqaabada kulanka iyo warbixinta saafiga ah ee uu ka siiyey xaalada dalku marayo. Waxey dhammaantood qireen in horumar baaxad leh oo waxqabad dhab ah lala yimid, iyagana ay diyaar u yihiin inay caawiyaan Dawladda Federaalka.

Ugu danbeyntii, Ra’iisul Wasaaraha ayaa u sheegay beesha caalamka in Dawlada Federaalka ee cusub ay la timid dhaqan-cusub oo isla xisaabtan ah, sidaas oo kalena uu ka dalbaday beesha caalamka inay dhaqankooda bedelaan oo kaalmadooda ay ku saleeyaan baahiyaha Dawlada iyo inay mashaariic horumarineed ay dalka ka hirgeliyaan sida dhismaha wadooyinka, buundooyinka iyo mashaariicda horumarineed oo shaqo abuur u noqoneysa dhalinyarada Soomaaliyeed.

DHAMAAD
Xafiiska Warbaahinta iyo Xiriirka
Muqdisho, Somalia

Pages