News From Halgan Net

Subscribe to News From Halgan Net feed
Somali News
Updated: 2 hours 45 min ago

Golaha Wasiirada oo bilaabay kulan wadatashi ah oo lagu dar-dargelinayo waxqabadka Xukuumadda.[Masawiro]

Tue, 05/02/2017 - 17:06

Muqdisho:- Ra’iisul Wasaaraha Xukuumada Federaalka Soomaaliya Mudane Xasan Cali Kheyre ayaa maanta daah-furay kulan wadatashi (Retreat) labo cisho ah oo ay xubnaha Golaha Wasiirada ku dar-dargelinayaan waxqabadka Xukuumadda. Ujeedada kulankan labada cisho ah oo ay wasiiradu ku gorfeynayaan qorshe-howlleedka xukuumada ayaa ah sidii qorsheyaasha wasaaradaha ay u noqon lahaayeen kuwo mideysan oo ka tarjumeysa barnaamijka xukuumadda. Sidoo kale ujeedada kulankan wadatashiga ah ayaa ah dhaqangelinta barnaamij yada isku xirka bulshada iyo daawladda, loogana hadli doonaa sidii loo dhaqangelin lahaa dawlad wanaag, isla xisaabtan, furfurnaan iyo u-adeegidda bulshada Soomaaliyeed.

Ra’iisul Wasaare Xasan Cali Kheyre oo daahfuray kulankan wadatashiga ah ayaa ka hadlay muhiimada wadatashiga oo uu sheegay in Wasiirada looga fadhiyo inay u adeegaan shacabka Soomaaliyeed. Ra’iisul wasaaraha ayaa yiri “Xukuumaddu waa inay horumuud ka noqotaa dardargelinta waxqabadka dowladda si loo kordhiyo kalsoonida shacabka oo muhiim u ah hirgelinta barnaamijka xukuumada. Aniga ka Ra’iisul Wasaare ahaan waxaan diyaar u ahay inaan furumaha dagaalka tago oo aan ciidanka geesiyaasha la wadaago daruufaha adag oo ay ku howlgalayaan, waxaana diyaar u ahay inaan nafteyda ku waayo oo aan u huro difaaca shacabka.”

Kulankan wadatashiga ah ee labada cisho ayaa lagu lafagurayaa arrimaha ay dowladu siisay mudnaanta sida ka hortaga abaaraha, soo celinta amniga & nabadeynta, kobcinta dhaqaalaha, la dagaalanka musuqmaasuqa, gaarsiinta doorashooyin hal cod iyo hal qof ah, dib-u-heshiisiinta, midnimada ummadda Soomaaliyeed iyo xiriirka caalamiga ah. Khubaro ku xeel dheer arrimaha mudnaanta leh ayaa jeedin doona casharo wasiirada loogu sharaxayo xaalada dalka iyo sida loo gaari karo in waxqabad dhab ah lala yimaado.

Sidoo kale, kulanka ayaa intii uu socday waxaa laga dhageystay cabashooyin qaar kamid ah shacabka oo iyagu ku biiriniyey tallooyinkooda Xukuumadda, waxana ay soo bandhigeen caqabadooyin kala duwan oo ay la kulmeen.

Ra’iisul Wasaare Xasan Cali Kheyre ayaa ugu danbeyntii kula dardaarmay Wasiirada inay waqtigooda ka faa’iideystaan oo labadan cisho ay ku soo saaraan barnaamij dhameystiran oo ay ku mideysan-yihiin si shacabka Soomaaliyeed loogu adeego. Wasiirada ayaa laga sugayaa inay soo saaraan siyaasad cad-cad oo dalka u horseeda horumar iyo in howlaha loo igmay dowladda ay hirgeliso iyadoo laga duulayo hiraalkii Madaxweynaha Jamhuuriyada Federaalka Soomaaliya Mudane Maxamed Cabdullaahi Maxamed (Farmaajo) ee ahaa Nabad & Nolol.

–DHAMMAAD–

Madaxweyne Kuxigeenka dowladda Puntland Eng.Camey oo gaaray degmada Buuhoodle.[Video]

Tue, 05/02/2017 - 12:28

Buuhoodle:-Madaxweyne Kuxigeenka dowladda Puntland Eng.Cabdi Xakiin C/laahi Xaaji Cumar Camay ayaa gaaray degmada Buuhoodle ee Gobolka Cayn waxaan si weyn u soo dhaweeyey dadweymaha reer Buuhoodle oo Mahad balaadhan uu u jeediyey waxaana uu jeediyey khudbd uu uga hadlay u jeedka safarkiisa uu ku tegay degmada Buuhoodle.

Wafdiga Madaxweyne Kuxigeenka dowladda Puntland Eng.Cabdi Xakiin C/laahi Xaaji Cumar Camey waxaa ay gargaar iskugu jira dawooyin raashin ay gaarsiiyeen degmada Buuhoodle oo uu ka dilaacay cudurka shuban biyoodka oo ay goobaha caafimaadku la daalaadhacayeen.

Hoos ka Daawo safarka uu Madaxweyne ku xigeenka dowladda Puntland Eng.Cabdi Xakiin Cabdullaahi Xaaji Cumar Camay ku tegay Buuhoodle

M_M_Deeq
Halgan.net

MAANDOON MA MUSLIMIINAA (2) W/Q Sheekh Dr C/raxmaan Sheekh Cumar

Mon, 05/01/2017 - 23:40

Allaa mahad leh naxariis iyo nabadgalyo nabi maxamad dushiisa ha ahaato.waxaan ararteeydii ka hadlay in diinta islaamka ay xaq saafi ah tahay iyo buur aan la nuuxin Karin allene xifdin doono ilaa qiyaamaha,waxa kale oo aan soo sheegay in aan qiimeeyn diineed iyo mid caqliba siin doonno dhaqdhaqaaqa MAANDOON oo aan u arko in loo sameeyay duminta diinta islaamka iyadoo la iska dhigayo in la horumarinayo loona hiillinayo.waxaan idiin soo bandhigaa maqaalka u horreeya oo ah
SIDEE DIINTA LOO JADIIDIIN KARAA? Qore :Abdallahi Aw Hassan
Qoraalkiisa:
(Haddii mushkilo la xallinayo waxaa muhiim ah in 3 arrin la helo, kuwaas oo kala ah:
A: In la xaddido dhibka jira nooca uu yahay.
B: Baaxadda ama qaddarka dhibku inta uu le’eg yahay
C: Dawada ama xalka iyo awoodda suulin karta dhibka
Waxaan baarayey diinta muddo ka badan 10sano gabagabadiina waxaan ogaadey in mushkiladu ka timid arrimaha soo socda;)
Abdalla wuxuu sheegay saddexda gees oo laga istaagayo marka la rabo in la xalliyo mushkilo,marka hore waa(1) in la xaddido dhibka jiro noociisa (2)baaxaddiisa (3)iyo sidii loo xallin lahaa ama dawadiisa.
Abdalla wuxuu sheegay in uu 10 (toban) sano muddo ka badan uu diinta baarayay wuxuuna ogaaday in mushkiladda ka timid arrimaha soo:
Qoraalkiisa:
(1: In axaadiista iyo aqwaasha culumada loo adeegsadey baabka xuquuqda iyo baabka ku saabsan waxa la xalaaleeyo ama la xarrimo sida axaadiista ku saabsan in qof aan wax dilin dhagax lagu dilo, qof maal xaday oo xubin dhan la jaro, dumarka oo laga xarrimo safarka, ragga oo laga xarrimo xirashada dahabka iyo xariirta iyo kuwo kale oo badan.)
Khabiirkan baaritaankiisii tobanka sano wuxuu soo ogaaday in mushkiladdu katimid in Axaadiista nabiga scw iyo aqwaasha culimada loo adeegsaday baabka xuquuqda iyo xalaaleeynta iyo in wax la xarrimmo.waxaa la yaab leh khabiirkan axaadiista waa waxyi waxna xalaleeysa waxna xaaraameeysa,xuquuqda dadkana kala caddeeysa,haddii la tuuro axaadiista ka hadleeysa xalaasha iyo xaaraanta iyo xuquuqda maxaa noo soo haray diinta islaamka.waxaa naloo diiday in aan iskeen wax u xalaaleeyno waxna u xarrinno:قال تعالى ولا تقولوا لما تصف السنتكم الكذب هذا حلال وهذا حرام لتفتروا على الله الكذب
Waxaad ka tuurtaa diinta oo ha adeegsanin inta xuquuqda ka hadleeysa sida dhaxalka xaqa isku leeyihiin labada isqaba xaqa ilaahay uu ku leeyahay addoomadiisa,xaqa dhiig haddii la kala galo,xubin waliba xaqeeda,iwm. Khabiirka wuxuu leeyahay intaana ha latuuro diinta.
Akhristayaasha waxaan idin weeydiinaa diintii maxaa kasoo haray sida khabiirka rabo haddaan dooneeyno in aan cusbooneeyno diinta.
Abdalla wuxuu soo qaatay tusaalooyin:
1- Qof aan wax dilin in dhagax lagu dilo sida qofka guur soo maray ee zineeysta in dhagax lagu dilo.
2- Qof maal xaday oo xubin dhan la jaro:قال تعالى السارق والسارقة فاقطعوا ايديهما
3- Dumarka oo laga xarrimo safarka maxram laaan
4- Raga oo laga xarrimo xirashada dahabka iyo xariirta.
5- Kuwo kale oo badan
Waxaa layaab leh abdalla maanka uu waxaan ku falanqeeynayo oo aayada tuugga oo culimada fiqhiga kada kitaabka xuduudda baabka xadka tuugada lana gaarsiyay 5 dirham hadduu xado in la jarayo ayuu ilaah uga naxariis batay allihii abuuray gacanta.oo wuxuu leeyahay side xubin dhan loo gooynaa qof aan waxba dilin.Maanka hadduu kaa lumo waxkastaa lagaa filanaa .
Mushkilada labaad ee hortaagan cusbooneeysiinta diintawaa:
Qore:
(2: In loo adeegsadey axkaanta qaarkeed aayado aan quraanka ku oollin oo la yiri waa la nasakhay sida xugunka rajmiga oo keenay in qof aan wax dilin dhagax lagu dilo. Waxaa kale oo la yiri waxaa jira aayaado quraanka ku jira oo nasakhan sida aayadaha 180 iyo 240 ee suuradda al-baqara oo ah aayado cadaynaya dadka dhaxalka leh iyo shuruuda dhaxalka, taasoo keentay inay dhaxalka soo galaan dad aan qaraabada ka tirsanayn sida sawjka aan wax dhalin iyo in bannaanka loo tuuro dad qaraabo ah oo dhaxalka wax ku lahaa sida awowga hooyada dhalay iyo awlaada gabdhuhu dhaleen)

Khabiirka wuxuu leeyahay mushkiladda labaad waa inaayado aan qorneeyn oo la yidhi waa la nasakhay xukunkooda la isticmaalo oo dhagax lagu dilo qofaan wax dilin..
Wuxuu ujeedaa aayadda rajmiga ee akhriskeeda la nasakhay xukunkeedana lagu dhaqmo.
Waxaa kamuuqda khabiirka in uusan isaga isdultaagin tobankii sano ee uu baaritaanka kujiray u fiirso bal erayga(waxaa kaloo la yiri)aayado quraanka kujira oo nasakhan sida aayadaha 180 iyo 240 ee suuratul baqara oo ah aayadoaayado caddeeynaya dadka dhaxalka leh iyo shuruudda dhaxalka taasoo keentay in ay dhaxalka soo galaan dad aan qaraabada ka tirsaneeyn sida sowjka aan wax dhalin iyo in bannaanka loo tuuro dad qaraabo ah oo dhaxalka wax ku lahaa sidasida awowga hooyada dhalay iyo gabdhaha ilmahooda.
Aayadda 180 (كُتِبَ عَلَيْكُمْ إِذَا حَضَرَ أَحَدَكُمُ الْمَوْتُ إِن تَرَكَ خَيْرًا الْوَصِيَّةُ لِلْوَالِدَيْنِ وَالأقْرَبِينَ بِالْمَعْرُوفِ حَقًّا عَلَى الْمُتَّقِينَ ﴿١٨٠﴾
Waxay ka hadleeysaa in qofka dhimanayo in qaraabada aan dhaxalka kujirin wax u dardaarmo’.
وَالَّذِينَ يُتَوَفَّوْنَ مِنكُمْ وَيَذَرُونَ أَزْوَاجًا وَصِيَّةً لِّأَزْوَاجِهِم مَّتَاعًا إِلَى الْحَوْلِ غَيْرَ إِخْرَاجٍ فَإِنْ خَرَجْنَ فَلاَ جُنَاحَ عَلَيْكُمْ فِي مَا فَعَلْنَ فِيَ أَنفُسِهِنَّ مِن مَّعْرُوفٍ وَاللّهُ عَزِيزٌ حَكِيمٌ ﴿٢٤٠﴾
Waxay ka hadleeysaa ciddada haweeneeyda laga dhintay ay loo dhaafo si wanaag ah guriga ninkeeda uga dhintay ilaa muddo sanad ah.

Waxa uu ka hadlayo khabiirka iyo waxa aayadaha ka hadlayaan shaqo iskuma laha Wuxuu rabaa in uu edit gareeyo quraanka oo isaga saxo ,fasirkana noo saaro. Mushkiladda saddexaad

W/Q Sheekh Dr C/raxmaan Sh Cumar

Madaxweynaha Puntland oo Kulan Layeeshay Isimada, Nabadoonada iyo Waxgaradka Gobolka Mudug.[Cod/Masawiro]

Mon, 05/01/2017 - 23:02

Gaalkacyo:-Madaxweynaha Dawladda Puntland Dr. Cabdiweli Maxamed Cali Gaas ayaa maanta 01 May 2017 magaalada Gaalkacayo kulan muhiima kula yeeshay maamulka gobolka Mudug, kan degmada Gaalkacayo, Isimada, nabadoonada iyo waxgaradka gobolkaasi.

Kulanka ayaa waxaa madaxweynaha ku wehelinaayey masuuliyiinka tirsan golaha wasiirada dawladda Puntland, maamulka gobolka Mudug, kan degmada Gaalkacayo, saraakiil ka tirsan madaxtooyada dawladda Puntland, Saraakiisha ciidamadda gobolka Mudug, nabadoonada iyo waxgaradka gobolkaasi, urrurada haweenka iyo kuwa dhalinyarada.

Madxweynaha Dawladda Puntland oo ka hadlay kulan ka ayaa sheegay waajibaadka koowaad ee saran dawladda uu yahay inay ilaaliso oo difaacdo qofka muwaadinka ah nabadiisa, maalkiisa, naftiisa iyo sharaftiisa, waxaana uu xaqiiyey madaxweynuhu in lakala leeyahay masuuliyadaasi oo ay marka hore leeyihiin gobolka, degmada iyo laamaha amaanka, isla markaana wixii ka taf dheeraada ay la wadaaqaan dawladda dhexe.

‘’ Dabcan masuuliyadaha waa lakala leeyahay dadka shacabka ah meelkastay ku noolyihiin cida sheegaynaysa inay dawladd u tahay ayaa amnigooda masuul ka ah, masuuliyada koowaad ee dawladdu leedahay waa in la difaaco qofka shacabka ah nabad-gelyadisa, naftiisa, sharaftiisa iyo maalkiisa in dawladu difaacdaa la rabaa, waana loo kala dhawyahay masuuliyadaasi dabcan cida ugu dhowi waa cida markaas maamulka haysa kasoo bilaabata degmo ku xigta gobol kabacdina dawladda dhexe, dabcan waxaa la rabaa maamulka degmada, gobolka iyo laamaha kale ee ka jiraa waa inay shaqada loo igmaday ee awoodooda ah ay fuliyaan, hadii ay ka taf dheeraato hawli waa inay ula yimaadaan dawladda dhexe, dawladduna markaa ay ku kaabto wixii ay ku kaabi karto’’ ayuu yiri madaxweynaha dawladda Puntland

‘’ Maxaa ka saran amniga oo masuuliyada dadka shacabka ah? Waxaa ka saaran 1) dadku marka ay xaaladan oo kale ku jiraan oo degaan ahaan meshaad ku talaan, colaada jirata, dhibka ka jira ee aad la wadaagtaan Soomaaliya oo dhan waxaa la rabaa dadku inay la filyihiin wacyiga ay ku jiraan, xaalada aad ku sugan tihiin maadaama ay xaalad amni daro tahay waxaa laydin ka rabaa inaad ahataan dad ku baraarugsan amniga’’ ayuu yiri Madaxweynuhu.

Madaxweynaha Dawladda Puntland ayaa hoosta ka xariiqay in dawladda Puntland iyo shacab keedu ay diyaar u yihiin nabad, isla markaana walaalahooda la deriska ah ay doonayaan inay nabad kula nooladaan, waxaan uu sheegay in Puntland ay diyaar u tahay nabad hadii ay wax kale doonayaana ay iyana nabad diyaar u tahay.

‘’ waxaan rabnaa angu nabad iyo nolol, nabad ayaan rabnaa inaan kula noolaano walaalaheen, fariinta aan dirayno waxa weeye oo walaalahayo u sheegayno nabad baan rabnaa, deriswanaag baan diyaar u nahay iyo horumarka aan ka wada shaqayno, waxaan rabaa inaan ku daro weliba, haday nabad rabaan nabad baan rabnaa, hadaysan nabad rabina, nabad baan rabnaa’’ ayuu yiri madaxweynaha dawladda Puntland.

Maamulka gobolka Mudug, kan degmada Gaalkacayo, isimada, nabadoonada iyo waxgaradka kulanka ka hadlay ayaa iyana dhankooda sheegay in ay dawladda ugu mahad celinayaan mashaariicaha horumarineed ee guud ahaan gobolada Puntland ay Dawladdu ka wado gaar ahaana gobolka Mudug xaruntiisa degmada Gaalkacayo, waxayna sheegeen inay dawladda ku garab istaagi doonaan mashaaricaha horumarineed ee gobolka ka socda.

Dhinaca kale Madaxweynaha Dawladda Puntland ayaa tibaaxay in dhismaha garoonka diyaaradaha Gaalkacayo ay ku baxayso kharash ka badan ‘’50 million’’, waxaana uu ugu baaqay shacabka magaalada Gaalkacayo in lagala shaqeeyo shirkada CCECC hirgelinta iyo dardargelinta dhismaha Garoonka.

Ugu danbayn, Madaxweynaha Dawladda Puntland Dr. Cabdiweli Maxamed Cali Gaas ayaa Alle SWC uga mahad celiyey raxmadiisa uu u shubay ummadiisa, waxaaana uu xaqiijiyey in dawladda Puntland ay diyaar u tahay garab istaaga dadka dhibaataysan caawintooda, xoolayntooda iyo wax qabadkoodaba.

Hoos ka Dhagayso khudbadii Madaxweynaha Dawladda Puntland Dr. Cabdiweli Maxamed Cali Gaas uu u jeediyey Waxgaradka Gobolka Mudug

Halkaan ka Dhagayso Mp3

–DHAMMAAD—

XAFIISKA, WARFAAFINTA, WACYIGELINTA HIDDAHA IYO DHAQANKA EE MADAXTOOYADA DAWLADDA PUNTLAND.

R/Wasaare Kheyre “Shaqadu waa nolosha iyo sumacada qofka, waana furaha hurumarka bani’aadamka”

Mon, 05/01/2017 - 17:18

Muqdisho:-Ra’iisul Wasaaraha Xukuumadda Federaalka Soomaaliya Mudane Xassan Cali Kheyre ayaa munaasabada 1da May, 2017 oo ah maalinta shaqaalaha Adduunka ugu hambalyeeyey dhammaan shaqaalaha Soomaaliyeed. “Waxaan hambalyo ku aadan maalinta shaqaalaha adduunka u dirayaa dhamaan shaqaalaha Soomaaliyeed ee udub-dhexaadka u ah dhaqaalaha iyo horumarka dalka guud ahaan” ayuu yiri Ra’iisul Wasaarahu.

Ra’iisul Wasaaraha ayaa iftiimiyey qiimaha weyn ee ay ummadda u leedahay shaqada iyo wax soo saarka shaqaalaha, dawladuna ay ahmiyad siinayso in munaasadaan shaqaalaha Soomaaliyeed ay ku xusaan dabaal dagyo ka turjumaya dareenkooda si ay u muujiyaan muhiimadda shaqada iyo shaqaalaha.

“Shaqadu waa nolosha iyo sumacada qofka, waa furaha hurumarka bani’aadamka. Bulsho kasta sida ay uga shaqo badan tahay tan kale ayay uga horeysaa, taas waa xaqiiqo ka jirta caalamka oo dhan. Hadii aaney shaqo jirin horumar iyo mustaqbal ma jiri karo” ayuu yiri Ra’iisul Wasaare Kheyre.

Ra’iisul Wasaaraha ayaa ka hadlay dadaalka Dawladda Soomaaliyeed ugu jirto inay abuurto shaqooyin, iyadoo laga faa’idaysanayo xoogga shaqaalaha ee diyaarka ah. Waxaana uu tilmaamay baahida loo qabo aqoonyahanka iyo xirfadleyaasha Soomaaliyeed. Isagoo ummadda ku baraarujiyay inay sameeyaan aqoon kororsi ayna bartaan xirfadaha shaqo ee xiligan loo baahan yahay.

__DHAMMAAD___

Prime Minister’s Media Office
Mogadishu Somalia

Wasaaradaha arrimaha gudaha Puntland oo ay ka soo baxeen amaro lagu sugayo amniga Boosaaso.[Akhri]

Sun, 04/30/2017 - 19:33

Boosaaso:- Wasaaradda Arrimaha gudaha iyo hormarinta reer miyaga dowladda Puntland ayaa waxaa ay soo saartay Amaro lagu xaqiijinayo Amniga guud Magaalada Boosaaso ee xarunta Gobalka bari. Amarka ka soo baxay Wasaaradda Arrimaha gudaha ayaa waxaa uu la xiriiraa in tiro koob lagu sameeyo baabuurta , bixinta taarikooyinka ,in dowladda hoose xakamayso bixinta ruqsadda gaadiida iyo amaro kale.

Hoos ka eeg warsaxaafeedka ka soo baxay Wasaaradda Arrimaha gudaha iyo hormarinta reer miyaga dowladda Puntland.

M_M_Deeq
Halgan.net

Wasaaradda Arrimaha Dastuurka oo kulan wadatashi ah la yeelatay haweenka.[Masawiro]

Sun, 04/30/2017 - 18:59

Muqdisho:-Wasaaradda Arrimaha Dastuurka ee Xukuumadda Federaalka Soomaaliya ayaa shir ku saabsan ololaha geedi socodka dib u eegista Dastuurka la qaadatay haweenka Soomaaliyeed, kulanka ayaa waxaa ka soo qaybgalay Wasiiro ka tirsan Xukuumadda Federaalka, Xildhibaanada Qaranka, iyo Gudoomiyaha Gobolka Benaadir ahna Duqa magaalada Muqdisho.

Ololahan oo ay Wasaaradda ugu magacdartay Sheeko Qarameed (National Conversation) ayaa waxaa maanta ay haweenka ugu doodeen sidii Dastuurka uu u noqon lahaa mid xoojiya xuquuqda haweenka Soomaaliyeed.

Wasiirka Wasaaradda Mudane Avv. Cabdiraxman Xoosh Jibriil oo shirka furay kuna soo dhaweeyay dhamaan ka soo qaybgalayaasha ayaa si qoto dheer uga hadlay muhiimadda haweenka ay u leeyihiin Qaranka gaar ahaan geedi socodka dib u eegista dastuurka.

Avv Xoosh Jibriil ayaa sheegay in Wasaaradda iyo haweenka Soomaaliyeed ay iska kaashan doonaan shaqooyinka muuhimka ah ee ay Wasaaradda u hayso dalka, sidoo kale Wasiirku waxa uu sheegay in shirarka noocan ah ee loogu magacdaray “Sheeko Qarameed’’ la gaarsiin doono dhamaan maamul goboleedyada dalka.

Wasaardda Arrimaha Dastuurka ayaa dar-dargelisay qabashada kulamada wadatashiga si Dastuurku u noqdo mid dalka u horseeda horumar iyo nabad.

—–DHAMAAD—–

Ra’iisul Wasaare Xassan Kheyre oo kula dar-daarmay Ciidamada NISA Dar-dar galinta sugidda amniga iyo xasilinta Caasimadda.[Masawiro]

Sun, 04/30/2017 - 18:15

Muqdisho :-Ra’iisul Wasaaraha Xukuumadda Federaalka ah ee Soomaaliya Mudane Xassan Cali Kheyre oo weheliyo Wasiirka Amniga Mudane Maxamed Abuukar Islow (Ducaale) iyo Taliyaha Hay’adda Nabad Sugidda iyo Sirdoonka Qaranka Mudane C/laahi Maxamed Cali (Sanbaloolshe), ayaa kula hadlay Ciidamo iyo saraakiil ka tirsan Hay’adda NISA xaruntii hore ee Xisbiga kuwaas oo ka howlgeli doona sugidda amniga Muqdisho.

Mudane Xasan Cali Kheyre ayaa tilmaamay muhiimadda ay ciidamadani u leeyihiin Amniga Caasimadda, isagoo kula dar-daarmay in gacan buuxda lagu qabto cid walba oo dhibaato ku ah amniga iyo kala danbeynta. Waxana uu ka dalbaday qeybaha kala duwan ee bulshada in ay la shaqeeyaan hay’adaha ammaanka, oo ay garabsiiyaan ciidamada si looga guuleysto cadowga had iyo jeer dhibaatooyinka u geysanaya Shacabka Soomaaliyeed.

“Maanta maalin ay Soomaaliya idiinka baahi badan tahay ma jirto, sugida amniga iyo xaqiijinta dawladnimadda Soomaaliya waa mid ku xiran tayadiina ciidan iyo hadba sidaad isu xilqaantaa,” Ayuu yiri Ra’iisal Wasaaraha oo intaas ku daray.

“qaranimadu maahan wax laysa siiyo, aduunka cid nasiin karta ma jirto anagu inaan dadaal iyo juhdi ku bixino mooyee, waana taas mida aan idin kugu imid maanta oo weliba hubo ka badan in aad mudan tihiin.” Ayuu yiri asagoo dareensiinayay ciidanka hawsha baaxada weyn oo hortaala.

______DHAMMAAD_______

Prime Minister’s Media Office
Mogadishu Somalia

Maan doon Diin U Doona W/Q Sheekh Dr C/raxmaan Sheekh Cumar

Sun, 04/30/2017 - 02:21

Mucjisada islaamka waxaa kamid ah ee tusineeysa in uu xaq yahay in uu u adkeeysto naqdiga iyo baadilka la malookeeyay ee aad moodeeyso in uu carro jiiri doono,buruskiisa iyo qaaqooyinka uu wato lamoodo in aan la hortistaagi Karin,iyadoo marka lagu taabto xaqa iyo xaqiiqada ay soo baxeeyso waxaan in uu yahay baadil ama xoor aan hoos nuxur ku lahayn.
قال تعالى كذلك يضرب الله الحق والباطل فاما الزبد فيذهب جفاء واما ما ينفع الناس فيمكث في الارض suugaanyahankii Abshir bacadle waa kii yiri”
“Ha u bixina waa baadil iyo bararaftiisiiye”
Ararta kale waa rususha ilaahay iyagaa diinta lagu soo dejiyay lana amray in ay caddeeyaan dadkana fahamsiiyaan kana ilaaliyaan wixii faham qallooc ah inta ay noolyihiin,kaddib waxaa masuul ka ah ilaalinteeda culumadii ka dhaxlay cilmiga oo ka soo xambaaray rususha ilaahay, waxaa tusinaya aayadda suuradda maaida 44aad waxaaقال تعالى:انا انزلنا التورات فيها هدى ونور يحكم بها النبيون الذين اسلموللذين هادوا والربانيون والاحبار بما استحفظوا من كتاب الله وكانوا عليه شهداء فلا تخشوا الناس واخشون ولا تشتروا باياتي ثمنا قليلا ومن لم يحكم بما انزل الله فاولئك هم الكافرون Allah wuxuu ku halleeyn jiray diimihii hore dadka culimada wax bandanna farahooda waa laga bixiyay sidaa darted ilaahay diintaan isagaa kafaalo qaaday in uu xifdiyo ilaa qiyaamaha inteey soo jirtayna isagaa soo ilaaliyay.
Qaylada culimada maalmahan ee kooxdii cusbeeyd al-saadicuun bilxaq laga hadlayay Ayaan waxaan maqlay qaylada sheikh maxamad maxamuud shible oo ka qeeyliyay kooxda la magac baxday MAANDOON uguna yeeray in ay ciidan ibleeys yihiin.Waxaan is idhi magacaan amuu ku weeynyahay oo walaalaha xaq laga galay gaar ahaan wadaadka shiikha u ah kooxda Abdiraxman maxamad jibril oo muddo iigu dambeeysay,kaddib waxaan galay barta kooxda, si aan u arko waxa ay aaminsanyihiin.Ragga oo sawirradooda iyo maqaalladooda ku qoranyihiin bogga waxaan ka gartay wadaadka aan soo sheegay.Gacanta iyo dhabankaan isa saaray yaab dartiis,kooxda warkeed waa qoranyahay waana cad yahay hadafkana waa in diinta la cusbooneeysiiyo,ilaahay iyo iyagana aan loo dhexeeyn, macnaha iyo ujeedada hadalkiisa.waxaan aqoonsaday qaylada sheikh shible in ay gar tahay eraygana uu ku yaryahay kana khatarsanyihiin,shabaab,saadicuun bil xaq iyo bidcooyinka kale.tusaaleahaan saddex maqaal oo aan akhriyay waa kuwan:
1- Side diinta loo jadiidin karaa Abdalla Aw hassan
2- Wadaadada iyo diinta:jinkii bariiska xabadda ku darsaday:
Cabdixakim Diiriye
3- Asalka kooxaha muslinka Ibrahim yusuf
4- Wadaadada dabci kululaa ma dac beey cabeen
5- Maandoon iyo maandooriye diimeedka
6- Wadaad dawakhsan iyo waranle dayeeysan
7- Ma waajibaa in gabdhaha madaxa qariyaan
Waa moowduucyada saaran barta Maandoon dhammaan waxay garaacayaan hal gool oo ah diinta in la cusbooneeysiiyo.loona bedelo sida maankooda waafaqsan.darbiga la mari laayahay waa wadaad markaa waa in wadaadkii la garaaco booskiisana la galiyo “maanka”(caqliga).Aniga waxaan idhi sh. Shible xaal qaado nimankan ma aha askartii ibliise (waa Madaxdii ciidanka Ibliis).ibliis wuxuu amar ku bixiyay ciidankiisa in ay iyaga ka amarqaataan maxaa yeelay howsha ay u dhar dhigteen waa in ay badalaan diintii ilaah soo dejiyay oo ay lasocodsiiyaan caqliga iyo maanka kooxda maandoon.Dadweeynaha muslimiinta iyo dhallinta waxaan ugu yeedhaa in lagu baraarugo khatarta kooxdaan kana khatarsan kuwa dhiigga daadinaya iyo kuwa dadka gaaleeysiinaya,maxaa yeelay qoladaa waxaa la tagay in aan si dhab ah loogu dhaqmin diinta waana in dadka lagu soo celiyaa diinta (sideey la tahay).qoladan waxay leeyihiin diinta ha la badalo si ay caqliga iyo casriga ula socoto.
Waxay isku dayayaan in ay wadaadada isu adeegsadaan xinifaha ka dhexeeya suufiya iyo salafiya isku garaacaan,erayga wahaabiya adeegsadaan si ay usoojiitaan qolooyin kale,lkn kooxda dhammaan waxay u arkaan kuwo lunsan shaqana kuma lahaa waxaanan jeclaan lahaa in aysan dabada la galin qolo kumeel gaarloola taxaalufo,waxaan jeclaan lahaa in qolo walba iska fogeeyso si aanay dadka ugu ekeeysiinin in ay qoladaa yihiin.
MAANDOON(caqli doon) waxaan leeyahay haddii maanka saxda aad dooneeysaan diintaa idiin haaysa sida ay u fahmeen salafkii ummaddaan,ilaahay baana xifdiyay diintaan,mana baddali kartaan suufi iyo salafiba waa idinka dhacsanayaan diinta alle ee xaqa ah.Qalinka waa lawada qaadayaa ,suugaantana waa la adeegsanayaa si xaqa loo sugo, baabkan adinkaa furee adkeeysigeeda lahaada.culimada haddeey dadweeynaha kiciyaan oo khatartan ku baraarujiyaan xaqeey uleeyihiin adinkana u qeeyshada gaalada idin tiri diinteennii waa badalnee tiinna badala ee gadaal idinka riixeeysa,qandaraaskana kasoo qaadateen.Abdiraxman maxamad jibril waxaan leeyahay xaqa usoo noqo ilaahna uga toowbad keen waxaan cusub xertaadana soo celi oo xaqa unoqoshadiisa waa fadiilah.Haddaa rabtaan wadaadada in laga banneeyo meesha oo diinta saa rabtaan ugu falaaddaan wax soconaa ma aha.Ayaan Xirsi kooxda in lagu daraa fiican maxaa yeelay haddeey ogaan laheed in ay diinta la badali karo kama baxdeen diinta,inta aad inkirsantihiin ayeey inkirtay oo kali ah.

W/Q Sheekh Dr C/raxmaan Sheekh Cumar

Madaxweynaha Puntland oo dhagax dhigay Garoonka Diyaaradaha Gaalkacayo, kana qayb galay xafladda daahfurka dhismaha Garoonka.[Masawiro]

Sat, 04/29/2017 - 22:20

Madaxweynaha Dawladda Puntland Dr. C/weli Maxamed Cali Gaas oo saacado kahor soo daahfuray mashruuca dhismaha jidka Garoowe iyo Eyl ayaa magaalaga Gaalkacayo ka dhagax dhigay dhismaha gaaroonka diyaaradaha Abdulaahi Yuusuf Axmed, isla markaana ka qayb galay xafladda daahfurka mashruuca dhismaha garoon kaasi.

Weftiga Madaxweynaha ayaa waxaa garoonka diyaaradaha Abdulaahi Yuusuf Axmed ku soo dhoweeyey masuuliyiin ka tirsan goloyaasha dawladda Puntland, maamulka gobolka Mudug kan degmada Gaalkacayo, masuuliyiin ka tirsan madaxtooyada Puntland, saraakiisha ciidama Puntland iyo qaar kamida shacabka magaalada Gaalkacayo.

Madaxweynaha ayaa waxaa safarka ku wehelinaayey madaxdda shirkada CCECC oo Puntland ka hirgelinaysa laba mashruuc oo waaweyn oo kala ah dhismaha garoonka diyaaradaha Gaalkacayo iyo samaynta jidka isku xidhidoona Garoowe iyo Eyl.

Soo dhoweyn kadib Madaxweynaha Dawladaa Puntland ayaa daahfuray dhismaha garoonka diyaaradaha ee magaalada Gaalkacayo, Madaxweynaha oo kahadlay xaflada haafurka gaanka ayaa sheegay in balan qaaadkii ahaa Hal-Sano, Hal Airport, Labo-Sano Labo Airport iyo Sadex-Sano Sadex Airpot uu maanta rumoobey madaama maanta la daahfurayo dhismaha garoonkii sadexaad ee caalamiya oo Puntland gudeheeda laga hirgeliyo.

‘’Waxaan xasuusta anigoo jooga dalka Ingiriiska gaar haan London ayaa waxaan ku iri dadka reer Puntland ee halkaasi jooga, Puntland ‘hal sano hal Airpot baan helaynaa Labo sano laba Airport iyo sadex sano sadex Airport’ maantana kii ugu danbeeyey ayan dhagax dhigaynaa, runtii Illahay ayaan ugu xamdi naqaynaa guushaasi, hada waxaanu soo dhagax dhignay wadada isku xidhi doonta Garoowe iyo Eyl, muhiimada kaabayaasha dhaqaalaha iyo isku xidhkoodu waa muhiim, waxayna muhiim u tahay isu socodka dalka, kaabayaasha dhaqaalaha iyo wadanku inii maalgashi helo,’’ ayuu yiri madaxweynuhu Dawladda Puntland

‘’inagu waxaan leenahay khayraad dabiiciya oo wadan keena ku duugan lakiin mahaysano aqoontii aan ku soo saran lahayn iyo dhaqaalihii aan kula soo bixi lahayn, dabcan markaan dhisano kaabayaasha dhaqaalaha waxaan helaynaa maalgashi debedeed oo iyagu ugu horeeyaan ‘’CCECC’’oo ah inay nagu tageeraan sidii aanu uga faa’iidaysan lahayn khayraadkayaga dabiiciga ah, meel fiican ayay maraysaa Puntland waayo majirto Soomaliya meel ay kajirto sadex International Airport’’ ayuu yiri Madaxweynaha Dawladda Puntlnd.

Dhinaca kale, Madaxweynaha ayaa ku booriyey shacabka Puntland gaar ahaan shacabka gobolka Mudug in lagu tageero shirkada fulinaysa dhismaha garoonka sidii ay u gudan lahaayeen waajibaad kooda shaqo, laguna garab istaago wax kasta oo suurayn kara dhaqaajinta mashruucaasi, waxaana uu sidoo kale sheegay madaxweynuhu in dhawaan iyana la bilaabi doono mashruuca balaadhinta iyo casriyaynta dekeda magaalada Boosaaso.

Madaxweynaha Dawladda Puntland ayaa ku booriyey shacabka Puntland in lala shaqeeyo shirkada CCECC oo Puntland ka fulinaysa ha labo mashruuc oo waaweyn, waxaana uu tilmaamay in guusha shirkada CCECC uu ku xidhan yahay hadba sidii ay ula shaqeeyaan dadka reer Puntland.

Ugu danbayn, Madaxweynaha Dawladda Puntland Dr. Cabdiweli Maxamed Cali Gaas ayaa si rasmi ah u dhagax dhigay dhismaha garoonka diyaaradaha ee magaalada Gaalkacayo, waxaana garoonka lagu dhammayn doonaa dhismihiisa mudo kayar halsano.

–DHAMMAAD—

XAFIISKA, WARFAAFINTA, WACYI-GELINTA, HIDDAHA IYO DHAQANKA EE MADAXTOOYADA DAWLADDA PUNTLAND.

Madaxweynaha dowladda Federaalka Soomaaliya oo dib ugu soo laabtay Muqdisho.[ Video]

Sat, 04/29/2017 - 19:11

Muqdisho:-Madaxweynaha dowladda Federaalka Somaliya Maxamed Cabdullaahi Farmaajo ayaa maanta dib ugu soo laabtey magaalada Muqdisho ee caasimada dalka Soomaaliya waxaana uu si kooban uga war bixiyey safarkii uu ku tagay dalka Turkiga.

Hoos ka Daawo Madaxweynaha dowladda Federaalka Soomaaliya oo dib ugu soo laabtay magaalada Muqdisho.

A/cawaale
Halgan.net

Wasaaradda Difaaca ee dawladda Federaalka Soomaaliya oo afhayeen cusub loo magacaabay

Sat, 04/29/2017 - 19:10

Muqdisho:-Wasaaradda Difaaca ee dawladda Federaalka Soomaaliya ayaa shaacisay in ay Afhayeen cusub u magacawday Wasaaaradda Difaac ee DFS waxaan xilkaas loo magacaabay afhayeenkii hore ee ciidanka Jubbaland Axmed Maxamuud Maxamed.

Hoos ka Akhriso warsaxaafadeed ka soo baxday Wasaaradda Difaaca ee dawladda Federaalka Soomaaliya

A/cawaale
Halgan.net

Daahfurkii mashruuca dhismaha wadada Eyl iyo Garowe[ Daawo Video]

Sat, 04/29/2017 - 19:09

M_M_Deeq
Halgan.net

Madaxweynha Puntland oo dalka dib u soo laabtay Garoowe, Daahfurayna Mashruuca Dhismaha Wadada Garoowe Iyo Eyl.[Masawiro]

Sat, 04/29/2017 - 18:59

Garoowe:-Madxweynaha Dawladda Puntland Dr. Cabdiweli Maxamed Cali Gaas iyo wefti uu hogaaminayo ayaa maanta 29 April 2017 dalka dib ugu soo laabtay kadib shirkii Madaxdda Africa ee Tana High Level Forum, waxaaana uu madaxweynuhu daahfuray dhismaha mashruuca wadada isku xidhidoonta Garoowe iyo Eyl.

Weftiga Madaxweynaha ayaa waxaa garoonka diyaarahadaha Kanooko ee magaalada Garoowe ku soo dhoweeyey Madaxweyne ku xigeenka Dawladda Puntland Eng. Cabdixakiin Xaaji Cabdulaahi Cumar Camey, Gudoomiyaha Baarlamaanka Puntland Mudane Axmed Cali Xaashi iyo ku xigeenadiisa, masuuliyiin ka tirsan goloyaasha dawladda Puntland, saraakiil ka tirsan Madaxtooyada dawladda Puntland iyo qaar kamida bulshada magaalada Garoowe.

Soo dhoweyn kadib Madaxweynaha Dawladda Puntland ayaa waxa uu daahfuray mashruuca dhismaha wadada isku xidhidoonta Garoowe iyo Eyl, xafladda daahfurka mashruucani ayaa ka dhacday xarunta jaamaca bariga Africa faraceeda magaalada Garoowe.

Madaaxweynaha ayaa sheegay in wadadani isku xidhi doonta Garoowe-Eyl ay ka mid tahay kaabayaasha dhaqaale ee lagu horumarinaayo Dawladda Puntland, isla markaana ay ka qayb ahayd balan qaadyadii xiligii ololaha uu u balan qaaday shacabka Puntland.

‘’Wadadani dabcan waxay kamid tahay kaabayaasha dhaqaale ee lagu horumarinaayo Puntland, runtii in badan baan ku celceliney muhiimada ay leedahay dhisida kaabayaasha dhaqaalaha dabcan idina waad fahansantihiin bay ila tahay, shirkada CCECC waa shirkad nala degan oo Puntland joogta Garoowe dhulna waa ku leedahay xafiisna waa ka furatay hadda, waaxaan rabnaa marka in bini aadanku xaalada uu ku jiro uu wax ka bedelo oo uu fekero waana sababta aan inagu xayawaanka uga duwanahay, inaan la nimaadno farsamo dhulkayaga aan ku dhisano ka faa’iidaysano khayraadkeena waa mid loo baahan yahay, wadan kanina majiro wax isbedela uu samaynaayo hadaan kaabayaasha dhaqaaluhu aysan is bedelin’’ ayuu yiri madaxweynaha dawladda Puntland.

Madaxweynaha ayaa sidoo kale tibaaxay in shirka Tana Forum lagaga hadlaayey ka Faa’iidaysiga khayraadka dabiiciga ah, waxaana uu sheegay in lagu lafagurayey shirka sidii looga faa’iidaysan lahaa khayraadka ay qaniga ku tahay Qaradani Afica.

‘’ Shir baan ka imid hada Tana Forum la yiraahdo oo madax badan oo African ahi isugu timid oo lagaga hadlaayey khayraadka Africa, waxaana keentay inaan ka hadalo waynaan ka faa’iidaysan khayraaadkaasi, Puntland waa meel mihiim u ah aduunka xeebta u dheer Soomaliya ayaan leenahay Soomaaliyana xeebta Africa u dheer ayay leedahay , Africa waa qaarada aduunka ugu qanisan marka laga hadlayo khayraadka dabiiciga ah (Natural resources ) hadana meel kastoo Africa ah dhibaataa ka taagan, ufiirso inaga waxaan la ciir-ciiraynaa abaar soo laab laabatay mana jirto meel aduunka abaari ka dhacdo Africa meeyo waayo waxaynaan ka faa’iidaysanayn khayraadkeenii dabiiciga ahaa’’ ayuu yiri Madaxweynaha dawladda Puntland.

Ugu danbayn Madaxweynaha Dawladda Puntland Dr. Cabdiweli Maxamed Cali Gaas ayaa kula dardaarmay shacabka Puntland inlaga wada shaqeeyo horumarka oo dawladda lagu garab istaago dedaalka ay ugu jirto inay horumariso kaabayaasha dhaqaalaha, waxaana uu sidoo kale xusay madaxweynuhu in horumarka Puntland kasocda uun san ka jirin meel kale oo Soomaaliya ah.

–DHAMMAAD—

XAFIISKA, WARFAAFINTA, WACYI-GELINTA, HIDDAHA IYO DHAQANKA EE MADAXTOOYADA DAWLADDA PUNTLAND.

Imtixaanaadka Xilliyada adag Sh Maxamuud Maxamed Xaliike.[Daawo Video]

Fri, 04/28/2017 - 17:54

Laascaanood:Waxaan idiin ku soo gudbinaynaa muxaadaro cusub oo ku saabsan Xilliyada adag iyo sidda ugu wanaagan ee looga bixi karo , iyadoo bilihii u danbeeyey Ummada Soomaaliyeed idilkeed ay ku jirtay Abaaro aad u kulul kuwaas oo aan horey u soo marin ,Muxaadaradaan ayaa waxaa soo jeedinaya Sh Maxamuud Maxamed Xalike oo ka mid ah culimada Soomaaliyeed ee ku nool Gobolka Sool.

Hoos ka Daawo muxaadaradii Sh Maxamuud Maxamed Xaliike

En Mawliid Isma Haradigeed
Laascaanood, Halgan.net

Nabadoon Maxamuud Farey oo Caawa lagu Dilay magaalada Gaalkacyo

Thu, 04/27/2017 - 21:27

Gaalkacyo :-Alle ha u naxariistee waxaa caawa lagu dilay magaalada Gaalkacyo ee xarunta gobalka Mudug nabaddoon Maxamuud Jamac Diirshe oo ku magac dheeraa Maxamuud Farey .
Nabaddoonka waxaa toogtay rag ku hubeysan baskoolado kuwaas oo ka baxsaday goobta dilka ka dib.

Kooxda Al-Shabaab ayaa dilka caawa fuliyey ka dib markii howlgalo ay ciidamada Puntland ka fuliyeen Boosaaso iyo Gaalkacyo lagu qabtay xubno ka tirsan kooxda Shabaab oo qaraxyo ka fulin lahaa deegaanada Puntland .

Kooxda Al-Shabaab ayaa dilal gaadmo ah ku dila Haldoorka umada Soomaaliyeed ka dibna baxsada ,Nabadoon Maxamuud Jamac Diirshe oo ku magac dheeraa Maxamuud Farey ayaa waxaa lagu dilay xaafadda Garsooor ee magaalada Galkacyo.

Ciidamada Amaanka ee magaalada Gaalkacyo ayaa soo gaaray goobta lagu dilay nabadoonka.

A/Cawale
Halgan.net

Sh.Xassan Daahir Aweys oo ka hadlay Taariikhda kooxda Al-Saaciduuna Bil-Xaq kana digay[ Video]

Thu, 04/27/2017 - 21:26

Muqdisho:-Sh.Xassan Daahir Aweys oo u xiran weli Dowladda Federaalka Soomaaliya ayaa waxaa uu soo duubay Muuqaal uu kaga hadlayo si faah faahsan koox dhawaan looga dhawaaqay dalka Masar balse ay ka mid yihiin rag Soomaali ah lana baxay Al-Saaciduuna Bil-Xaq ayaa waxaa uu Sheekhu ku tilmaamay in ay la fikrad yihiin Kooxda Takfiir fikrigooduna uusan waxba iska bedelin.

Sh.Xassan Daahir Aweys ayaa ku tilmaamayu kooxdaan in ay tahay mid khatar ku ah shacabka Soomaaliyeed ee Muslinka ah oo ay iyagu ka aamisan yihiin in ay yihiin Gaalo loona baahan yahay in hadda ay soo galaan Islaamka.

Sh.Xasan Daahir Aweys ayaa waxaa uu aad uga hadlay wixii soo dhexmary xubno ka mid ah kooxda Al-Saaciduuna Bil-Xaq oo uu xusay Sheekhu in uu la galay dood fara badan ka dib markii ay gaalnimo ku xukumeen shacabka Soomaaliyeed ayna diideen in ay la tukadaan salaadaha.

Sheekh. Xassan Daahir Aweys ayaa waxaa uu sheegay in aan wax diin ah laga qaadan karin kooxda Al-Saaciduuna Bil-Xaq ayna ahayn culimo’diinta diinta Islaamka wax ka yaqaan arrinkaas oo uu ku cadeeyey dood fara badan oo ay culimada Soomaaliyeed ay la galeen ragga madaxda u ahaa kooxdaan.

Sh. Xassan Daahir Aweys ayaa ugu baaqay culimada Soomaaliyeed in ay la furaan dood diini ah waxaan uu xusay in kooxdaan Al- Saacid uuna Bil-Xaq in aan la dilaynin ilaa ay iyagu hub u soo qaataan umada Soomaaliyeed loona dhaqmayo siddii Iimaam Cali Ibnu Abii Dhalib kooxdii Khawaarijta.

Hoos Ka Daawo Sh.Xassan Daahir Aweys oo ka hadlaya kooxda Al-Saaciduuna Bil-Xaq

A/cawaale
Halgan.net

Madaxweyne kuxigeenka Puntland Eng Camey ” Puntland Laguma Arki Karo Ururka Al-Saadicuun Bil-xaq

Thu, 04/27/2017 - 21:25

Garoowe:-Madaxweyne kuxigeenka dowladda Puntland ahna ku simaha Madaxweynaha Eng. Cabdixakiin Xaaji C/laahi Cumar Camey ayaa maanta 27 April 2017 shir jaraa’id uu ku qabtay qasriga madaxtooyada magaalada Garoowe waxa uu kaga hadlay urrurka lunsan ee ku dhuumanaya diinteena suuban ee Islaamka AL-Saaciduuna Bil-xaq, kuwaas oo hore looga mamnuucay inay sii joogaan gudaha degaanada Puntland.

Shirkani Jaraa’id ayaa waxa Madaxweynaha ku wehelinaayey Masuuliyiin katirsan goloha xukuumada dawladda Puntland, Taliyaha Ciidamadda Puntland iyo masuuliyiin ka tirsan Madaxtooyada dawladda Puntland.

Kusimaha Madaxweynaha ayaa sheegay in Dawladda Puntland ay hore amar cad oo ku aadan urrurka Al-Saaciduuna Bil-xaq u soo saartay, isla markaana ay sheegtay in uu mabnuuc ka yahay ururkaasi lunsan gudaha Puntland uguna degtey ummada Soomaaliyed, maantana ay mawqifkaasi ku taagan tahay.

‘’ Waxaan ummadda Soomaaliyeed u sheegayaa meelkastay joogaan iyo maamuladaba mawqifka Puntland iyadaa ugu horeysey inay Toosh ku ifiso, kahadasho si qeexan war uga soo saarto urrurka lunsan ee AL- Saaciduuna Bilxaq, waxaana u cadaynaynaa ummadda Soomaliyeed una sheegaynaa urrurkaasi inuu xaaraan yahay, Puntland xaraan kahay, arlo Soomaaliyeed-na xaaraan kayahay wax alaale iyo wixii waajibaada oo laga qaadan karayona laga qaato, culumadu doorkooda waa qateen dawladduna doorkoodu waa qadanayaan, hadii shaki jirey oo qalad ka dhacay masuuliyiin ka tisan dawladda waa saxnay siyaasada iyo mawqifka dawladduna waa cadyahay’’ ayuu yiri Madaxweyne ku xigeenka Dawladda Puntland.

Madaxweyne Kuxigeenka Dawladda Puntland ayaa sidoo kale ka hadlay abaarta baaxadale ee kajirta Puntland, waxaana uu sheegay inay ka da’day raxmada Eebbe degaano badan oo Puntland ah.

‘’Marwalba waa niraahnaa abaaruhu maalinba maalinta ka danbaysa waa ka sii xumaanayaan lakiin Ilaahay waxaan uga mahad celinaynaa raxmadiisa roobku shalay wuu curtay dhulalbadana waa uu ka da’ay haku yaraado ama haku badnaadee taasina waa mahad Alle waana war wanaagsan, hadana markasta oo wakhtigu sii dheeraadana in hawshani ay sii kordhayso baahideeduna sii baladhanayso layskuma hayo ‘’ ayuu yiri kusimaha Madaxweynuhu.

Siidoo kale Kusimaha Madaxweynaha Puntland ayaa sheegay in dawladda Puntland ay ku heelan tahay qorshe cadna kayeelatay sidii looga caawin lahaa ummadda Soomaliyeed ee deegaanada Puntland kusoo hayaantay inay ku guryo noqdaan degaanadoodii kuwaas oo uu sheegay madaxweynuhu inay ka kala yimadeen Dawaladd degaanka Soomaalida Ethiopia, Soomaaliland, Galmudug iyo gobolada dhexe ee Soomaaliya.

Madaxweyne kuxiigeenka ayaa ku wargeliyey dadkaasi ku soo hayaamay Puntland cidii doonaysa inay ku guryo noqdaan degaamadoodii inay lasoo xidhiidhaan masuuliyiinta degmooyinka ku aag-dhow meesha ay degen yihiin iyo gobolada Nugaal, Bari iyo Karkaar si loogu fududeeyo rabitaan kooda.

Ugu danbayn, Madaxweyne kuxigeenka Dawladda Puntland ahna kusimaha Madaxweynaha Egn. Cabdixakiin Xaaji Cabdulaahi Kumar Camey ayaa hambalyo u diray ciidanka Dawladda Puntland ee ku heelan difaacida iyo ilaalinta sharafta shacabkooda, waxaana uu si gaara u bogaadiyey ciidamada magaalada Boosaaso ku soo qabtay walxaha qarxa, kuwaas oo cadawgu ku tala jireen inay ku wax yeeleeyeen shacabka magaaladaasi.

–DHAMMAAD—

XAFIISKA, WARFAAFINTA, WACYI-GELINTA HIDDAHA IYO DHAQANKA EE MADAXTOOYADA DAWLADDA PUNTLAND.

Wasaaradda Arrimaha Gudaha oo soo saartay War Murtiyeed ku saabsan Wadahadalada Gal-Mudug iyo Ahlu Sunna Wal-jamaaca

Thu, 04/27/2017 - 21:25

Muqdisho:-Wasaaradda Arimaha Gudaha iyo Federalka Soomaaliya ayaa waxaa ay soo saartay War Murtiyeed ku saabsan wixii ka soo baxay wada hadalkii u dhexeeya  Maamulka Galmudug iyo kan Ahlusunna , War murtiyeedka ayaa waxaa uu u qornaa sida tan:-

Hoos ka eeg Wasaaradda Arimaha Gudaha oo soo saartay War Murtiyeed ku saabsan Wadahadalada Galmudug iyo Ahlu Sunna Wal-jamaaca

 

 

M_M_Deeq
Halgan.net

Shirkii Golaha Wasiirada Soomaaliya oo Arimo kala duwan Looga hadlay

Thu, 04/27/2017 - 16:18

Golaha Wasiirada ee Xukuumada Federaalka Soomaaliya ayaa maanta yeeshay kulankoodii caadiga ahaa oo uu shir-guddoominayay Ra’iisal Wasaaraha Xukuumada Mudane Xasan Cali Kheyre. Arrimaha kulanka looga hadlay ayaa waxaa ka mid ahaa Amniga Qaranka, Maareynta Maaliyada, Abaaraha, xaalada shuban-biyoodka, Qorshaha Horumarinta Qaranka iyo arrimo kale.

Warbixinta amniga ayaa lagu xusay in qorsheyaasha howlgalka ciidamada uu meel wanaagsan marayo. Ra’iisul Wasaaraha ayaa u mahadceliyey Guddoonka iyo Guddiyada Difaaca & Amniga ee Baarlamaanka oo uu xalay kulan xog-wareysi ah la qaatay, iyadoo baarlamaanku uu si furfuran ula xisaabtamay Xukuumada Qorshaha Amniga Qaranka. Falanqeyn dheer ka dib, waxaa la isla gartay in macluumaadka la wada wadaagay labada dhinac ay muhiim ahaayeen, laguna ballamay in waxii tallooyin ah la wada wadaago.

Wasaarada Maaliyada ayaa ka warbixisay xaalada Maamulka & Maareynta Maaliyada iyo qorshaha mideynta dakhliyada hay’adaha kala duwan oo dhammaan lagu ballamay in khasnada dowladda lagu soo shubo. Wasiiru Dowlaha Maaliyada ayaa sheegay in mudnaanta koowaad ay siiyaan raashinka ciidanka, mushaarka ciidanka iyo shaqaalaha rayidka ah.

Wasiirka Gargaarka & Maareynta Masiibooyinka ayaa ka warbixisay xaalada gurmadka gargaarka oo ay sheegtay in iskudubaridka iyo xiriirka uu si fiican u socdo. Wasiirada ayaa sheegtay inay qorsheynayaan bisha Ramadaan inay gargaar gaarsiiyaan qoysas gaaraya 100,000.

Wasiirka Caafimaadka ayaa ka warbixisay xaalada shuban-biyoodka iyo Daacuunka oo ay sheegtay in dad gaaraya 31,764 ay cudaradan la daalaadhacayaan iyadoo xarumo ku yaalla 50 degmo lagu dabiibayo. Illaa iyo hadda waxaa la soo sheegay in 618 qof ay u dhinteen cuduradan, iyadoo ay socoto dadaal tallaal ah oo 450,000 oo qof la tallaalay.

Wasiirka Qorsheynta ayaa ka warbixiyey dhaqangelinta barnaamijka Qorshaha Horumarinta Qaranka oo uu sheegay muhiimada dhammaan hay’adaha dowladda inay qorshahooda ku saleeyaan Qorshahan Horumarinta Qaranka.

Hay’adaha Caalamka iyo Dowladaha taageera Soomaaliya hadda ka dib waa in kaalmadooda ay ku soo saleeyaan Qorshahan iyadoo Dowladda Federaalku ay saxiixi doonto dhammaan kaalmada caalamiga ah ee Soomaaliya.

—-DHAMMAAD—-

Pages