News From Halgan Net

Subscribe to News From Halgan Net feed
Somali News
Updated: 1 hour 31 min ago

Hogaanka Cusub Ee Mu’asasada Al-Minhaaj Gobolka Karkaar oo Xilka La wareegay.[Masawiro]

Thu, 09/07/2017 - 10:18

Qardho:-Xaflada xilwareejinta maamulkii hore ee Al-minhaaj Qardho ayaa xalay ka dhacday hoolka shirarka ee hotel gufure xafladaan oo ahayd mid si heer sare ah loo soo agaasimay ayaa waxaa kasoo qayb galay maamulka gobolka Karkaar, maamulka waxbarashada degmada qardho, maamulka degmada qardho,culimo, aqoonyahan, maamulka Al-minhaaj heerarkiisa kala duwan sida shuurada qardho,maamulkii hore ee qardho, maamulka Al-minhaaj ee gobolka iyo puntland ba.

Xafladu intii ay socotay ayaa shiikh xasan muuse nuux wuxuu soo bandhigay waxqabadkii u qabsoomay intuu xilka joogay kaas oo ahaa waxqabad hal abuur lahaa iyo Shaqooyin waaweyn oo lataaban karo mudadaasi yar waxaa kaloo uu goobta ku wareejiay hab raaci shaqada oo ay waheliyaan waxqabadkii mudadaasi asagoo shahaadooyin dhiiri gelin ah gudoonsiiyay dadkii shaqada la qabtay kuwii ugu shaqada badnaa ee loo aqoonsaday madaalayaal.

Intaasi ka gadaal ayaa waxaa kalmado kala duwan jeediyay masuuliyiintii madasha kasoo qayb gashay , ayadoo uu gudoomiyaha cusub Sh.Maxamuud Ciise Shire Ayaa dadka Xaflada kasoo qayb galayy kacodsaday in ay garba uwada noqdaan taasna lagu gudan karo Shaqada loo igmaday .

[See image gallery at halgan.net]

Waxaa Xusid Mudan In Gudoomiyaha Cusub Uu Kamid ahaa maamulkii hore ee xasan lasoo shaqayay, isla markaas ah maamulka machadka khadiija ee qardho Waxaana lafilayaa in uu La’imaan doono Dardar Cusub Taas oo suurtagalin doonta insha Allah sidii loo gaarilahaa Himilada Al-Minhaaj Guud Iyo Gaar Ahaan Gobolka Karkaar.

Nuur Jaamac Aadan
Xafiiska Warbaahinta Al-Minhaaj

Madaxweynihii hore ee Galmudug Cabdikariin Xuseen Guuleed oo ka Jawaabay Hadalkii Golaha Wasiirada.[Dhagayso]

Wed, 09/06/2017 - 21:37

Muqdisho:-Madaxweynihii hore ee Galmudug Cabdikariin Xuseen Guuleed ayaa ka jawaabay go’aanka Gollaha Wasiirada ee lagu sheegay in heshiis la saxiixay 2-dii May 2016 oo ay Dawladda Federaalka Soomaaliya iyo Dawladda Federaalka Ethiopia ku heshiiyeen in ay si wada jir ah isaga kaashadaan la dagaallanka nabad-diidka iyo argagixisada si loo xaqiijiyo sugidda amniga iyo xasilloonida labada dal. Go’aanka dawladda waxaa sidoo kale lagu sheegay in Heshiiskan ay Dowladda Federaalka u wada saxiixay Wasiirkii hore ee Boostada iyo Isgaarsiinta Mudane Maxamed Jaamac Mursal (Geelle) iyo Mudane Cabdikarin Xuseen Guuleed.

Hoos ka Dhagayso Ridwaan Xaaji Cabdiwali ayuu u warramay isagoo ku sugan magaalada Ankara ee dalka Turkiga.

Source:VOA

Wasaaradda Arrimaha Dastuurka oo qiimayn dhanka Maamulka iyo Maaliyadda lagu sameeynayo.[Masawiro]

Wed, 09/06/2017 - 21:36

Muqdisho:-Agaasimaha Guud ee Wasaaradda Arrimaha Dastuurka Mudane Maxamed Abuukar Zubeyr iyo dhamaan Agaasime Waaxeedyada ee Wasaaradda ayaa la kulmay Benson Mutiso oo ka socday hay’adda Baker Tilly Merali’s oo ah hay’ad ay UNDP u xilsaaratay in ay qiimayn ku sameeyso dhamaan hay’adaha dawladda iyada oo la ogaanayo awoodda hay’adaha dawladda ee dhanka tayada maamulka iyo shaqaalaha. Qiimeynta Wasaaradda lagu sameeynayo ayaa socon doonta 3 maalin.

Agaasimaha Guud oo warbixin siinayay Benson ayaa u sheegay in Wasaaradda ay soo martay marxalado kala duwan iyada oo ka soo gudabtay heer aysan lahayn wax xafiisyo ah iyo shaqaale tayo leh markaa oo ay ahayd waqtigii la kala gooyay Wasaaradda Dastuurka iyo Wasaaradda Cadaaladda ee horaantii 2015.

[See image gallery at halgan.net]

Barnaamijkan oo lagu magacaabo HACT Assessment ayaa sadax sano ka hor laga sameeyay dalka, waxaana hadda lagu ogaanayaa heerka ay gaarsiinsantahay awoodda maamul iyo shaqaale ee dawladda.

Ugu dambayn, Wasaaradda ayaa waqtigan waxaa laga dareemayaa in ay sameeysay horumar dhanka maamulka iyo shaqalaha kadib hawlo baaxad leh oo bilooyinkii la soo dhaafay ay ka fulisay dalka iyadoo salka u dhigtay nidaam ku dhisan hufnaan, daah-furnaan, iyo islaxisaabtan.

—–DHAMAAD—-

Sidee looga gudbi karaa dhibaatooyinka ay gaystaan dadka sida sharci darada ah daawaynta iyo caafimaadka faraha ugula jira?

Wed, 09/06/2017 - 21:27

Bosaaso:-Sidee looga gudbi karaa dhibaatooyinka ay gaystaan dadka sida sharci darada ah daawaynta iyo caafimaadka faraha ugula jira?
1) In la xoojiyo dawladnimada iyo qaanuunku inay sareeyaan, maxaa yeelay qaybo badan oo dadkaas kamid ihi dhibaataynta umadda way u bareereen.
2) Cidii umadda hoggaan iyo maamul u sheegata, waxaa waajib ku ah inay xil wayn iska saaraan waxkaqabadka dadka sharcidarada wax ku daawaynaya, heer kasta oo maamulkaasi yahay dawlad dhexe, maamul goboleed, wasaarad, gobol, degmo intaba.

3) In la sameeyo wacyigalin xoogan oo dadka looga baraarujinayo dhibaatooyinka ka imaan kara wax daawaynta khaldan, ama ha ahaato daawooyinkii oo aan loo marin dariiqii saxda ahaa, ama daawo dhaqameed iyo shifo si khaldan loo adeegsado.

4) Dariiqa saxda ah ee wax daawayntu waa in qofka bukaa u tago dhakhtar takhasus u leh qaybta laga hayo, kadibna la racaa habka dhaqtarku ku taliyey daawo, baaritaan iyo qaliin intaba, taasi waa mida tajribada biniaadamka, laakiin mida ruuxiga ah waxaa noo furan inaan isku tufno quraanka iyo adkaarta saxiixa ah oo Nabi Maxamed NNKH kasoo aroortay.

5) Dhaqaatiirta takhasuska u leh cudurada ay daawaynayaan waa inay Allaah uga baqaan talooyinka iyo daawaynta dadka ay u samaynayaan, oo dadaalkoodu kaliya yuusan noqon siduu qofkaan buka uga faaiidaysan lahaa, ee hanoqdeen dhakhaatiirtaasi la taliye daacad ah, hana ogaadaan haday maanta qaanuunka iyo isla xisaabtanka aduunka ka fakadaan, inay jirto maalin aysan fakan doonin, hana ka taxadaraan agabka iyo daawooyinka ay dadka daawayntiisa u isticmaalayaan intii awoodood ah, dhaqaatiirta qaar oo masuuliyadaas xil iska saaray ayagaa keensada agab caafimaad oo la hubo iyo daawooyin aan been abuur ahayn.

6) Qofkii dhaqtar iska dhiga asagoon aqoon ku filan u lahayn, wixii uu gaysto aduunkana waa loo raacanayaa oo waxaa lagu yeelanayaa mag iyo qisaas iyo qaan sida dadka kale oo umadda ku xadgudba, aakhirona waa danbiile, xoolaha uu ku kasbaana waa xaaraan.

7) Ganacsatada daawada ka shaqaysataa Allaah ha uga baqeen dawooyinka ay iibinayaan, laga bilaabo kuwa soo dajiya ilaa kuwa farmashiyeyaasha ku tafaariiqeeya, oo yaysan ka ganacsan daawooyin aan tayo lahayn ayagoo sidaas ku og, sidoo kalena daawooyinka aan dadka la siin Karin dhaqtarku inuu qoro mooyee yaysan bulshada ka iibin.

 

W/Q Sh Axmed Dheeli

Xukuumadda JFS oo ku tilmaamtay Qalbi Dhagax Argagixiso qiratayna in ay dhiibtay(Akhriso)

Wed, 09/06/2017 - 17:29

Golaha Wasiirrada ee Xukuumadda Federaalka Soomaaliya ayaa maanta yeeshay kulan aan caadi aheyn oo uu shir-guddoominayay Ra’iisal Wasaaraha Xukuumadda Mudane Xasan Cali Kheyre. Arrimaha kulanka looga hadlay ayaa ahaa arrimaha amniga Qaranka iyo dhacdadii sarkaalka Jabhadda hubeysan ee ONLF.

Golaha ayaa ugu horeyn warbixin ka dhageystay hay’adaha amniga ee la xiriira xaaladaha amni ee dalka guud ahaan, gaar ahaan dhacdadii sarkaalka Jabhada hubeysan ee ONLF, waxeyna sheegeen in uu abaabulayey falal lid ku ah amniga dalka oo uu in muddo ah ka dhexwaday dalka gudahiisa, xiriirna uu la lahaa kooxaha argagaxisada ah ee Al-Shabaab.

Warbixinta amniga qaranka ka dib ayaa Ra’iisul Wasaaraha wuxuu ka codsaday xubnaha golaha wasiirrada in ay ka doodaan, falanqeeyaan, eegaana dhanka siyaasada iyo dhanka sharciga guud ahaan.

Wasaaradda Cadaaladda ayaa warbixin dhanka sharciga ah ka siisay golaha wasiirrada ee ku aadan habraacyada muhiimka ah ee Sharciga dalka iyo Heshiisyadii hore oo ay wada galeen Dowladda Federaalka Soomaaliya iyo dowladda Federaalka Ethiopia.

Golaha waxaa la horkeenay nuqulka Heshiisyo ay Dowladda Federaalka Soomaaliya la gashay Dowladda Ethiopia ee 07dii Juun 2015kii kaas oo dhanka Soomaaliya uu u saxiixay Wasiirru Dowlihii Madaxtooyada JFS Xildhibaan Mahad Maxamed Salaad ee dawladdii Madaxweyne Xasan Sheekh Maxamuud.

Heshiiskan ayaa u aqoonsanaya kooxaha hubaysan oo ay ka mid yihiin Al-Shabaab iyo Jabhadda ONLF in ey khatar ku yihiin amniga labada dal, meelna looga soo wada jeesto oo labada dal ay iska kaashadaan si wada jir ah.

Waxaa sidoo kale la horkeenay Golaha Wasiirrada heshiis la saxiixay 2dii May 2016 oo ay Dawladda Federaalka Soomaaliya iyo Dawladda Federaalka Ethiopia ku heshiiyeen in ay si wada jir ah isaga kaashadaan la dagaallanka nabad-diidka iyo argagixisada si loo xaqiijiyo sugidda amniga iyo xasilloonida labada dal. Heshiiskan waxaa Dowladda Federaalka u wada saxiixay Wasiirkii hore ee Boostada & Isgaarsiinta Mudane Maxamed Jaamac Mursal (Geele) iyo Mudane Cabdikarin Xuseen Guuleed.

Qodobbada Heshiiskaas oo kuwa ugu muhimsan ay ahaayeen “In si buuxda aan isaga kaashanno la dagaallanka iyo cirib tirka kooxaha argagixisada ah gaar ahaan Alshabaab iyo ONLF”.

Dood dheer ka dib, golaha wasiirradu waxey go’aamiyeen arrimahan:

1) In Siyaasada Dowladda Federaalku ay tahay mid ku qotonta iskaashi dalalka geeska Afrika ah, xoojineysana nabad ku-wada-noolaanshaha mandaqadda, xoojinta dhaqaalaha, iskaashiga iyo amniga, isla markaasna aan Jamhuuriyada Federaalka Soomaaliya loo oggoleyn in jabhado hubeysan ama kooxo argagaxiso ah ay gabbaad ka dhigtaan.
2) Golaha Wasiirradu waxey hoosta ka xarriiqeen in shaqsigani uu ahaa sarkaal sare 00 ka tirsan Jabhadda hubeysan ee ONLF, isla markaasna uu falal lid ku ah amniga dalka uu ka dhexwaday geyiga Soomaaliya iyo mandaqadda, iskaashi dhowna la lahaa kooxaha araga-gixisada ee Al-Shabaab.

3) Dowladda Federaalka Soomaaliya waxa ay diyaar u tahay in ay kaalin firfircoon ka ciyaarto wax walba oo ka qeybqaadanaya nabadeynta mandaqada si waafaqsan Dastuurka iyo Shuruucda dalka. Dawladda Federaalka Soomaaliya waxey garowsan tahay doorka ciidamada waddamada deriska ah ee Djibouti, Kenya, Ethiopia, Burundi iyo Uganda ay si hagar la’aan ah uga garab-dagaalamayeen ciidamada Qaranka Soomaaliyeed si dalka loogu soo dabaalo xasilooni waarta.
4) Golahu waxuu mar kale hoosta ka xarriiqay heshiiyadii iskaashi ee ay Dawladda Federaalka Soomaaliya iyo Dawladda Federaalka Ethiopia ay kala saxiixdeen sida heshiiskii 07dii Juun 2015kii iyo heshiikii 2dii May ee 2016 oo tilmaamaya in dhan looga soo wada jeesto arrimaha amniga iyo nabad ku wada noolaanshaha mandaqadda. Heshiisyadan waxey si cad u qeexayaan “In cadowga labada dhinac ee Al-Shabaab iyo Jabhada ONLF ay khatar ku yihiin amniga labada dal, meelna looga soo wada jeesto oo labada dal ay iska kaashadaan si wada jir ahna ula dagaalamaan”.
5) Waxaa reebban isla markaasna mamnuuc ah in Jamhuuriyadda Soomaaliya gudaheeda ay kooxaha argagaxisada iyo kooxaha hubeysanba ka dhigtaan gabbaad ay dagaallada iyo collaadaha ka huriyaan oo ay kaga duulaan wadammada jaarka ah.
6) Dawladda Federaalka Soomaaliya waxa ay ka qaadi doontaa tallaabooyin cad-cad oo Sharciga waafaqsan cid kasta oo isku dayda in ay jabhado hubeysan ka dhex abuurto dalka gudihiisa ama ay taageeraan kooxo argagaxiso ah iyagoo maleegaya falal lid ku ah dalka gudihiisa ama/iyo waddamada jaarka ah.

7) Xukuumadda Federaalka Soomaaliya waxa ay dib-u-eegis ku samaynaysaa Heshiisyadii ay dawladdii hore gashay si qabyo-tir loogu sameeyo wixii galdaloolooyin ah ee ku jira (haddii ay jiraan) loona waafajiyo habraac-yada Sharci ee dalka.

—DHAMMAAD—

R/W DFS Xasan Cali Kheyre oo maanta Booqday Xarunta Wasaaradda Warfaafinta

Mon, 09/04/2017 - 19:31

Muqdisho:-Ra’iisul wasaaraha Xukuumadda Federaalka Soomaaliya Xasan Cali Kheyre ayaa maanta kormeer shaqo ku yimid Xarunta Wasaaradda Warfaafinta, dhaqanka iyo Dalxiiska ee Xukuumadda Soomaaliya.

Mudane Xasan Cali Kheyre ayaa kulamo la qaatay masuuliyiinta Wasaaradda, uu ugu horeeyo Wasiirka warfaafinta Mudane Cabdi raxmaan Cumar Cismaan Eng: Yariisow ku xigeenka C/raxmaan Iidan Yoonis iyo qaar kamid ah Agaasimahaasha Waaxyaha ee Wasaaradda.

Wasiirka Warfaafinta, dhaqanka iyo Dalxiiska ee Xukuumadda Soomaaliya Eng, Cabdiraxmaan Cumar Cismaan Yariisow ayaa warbixin ka siiyay Ra’iisul Wasaaraha hawlaha ka socda Wasaaradda, Waaxyaha kala duwan sida ay u shaqeynayaan iyo dowr ka Wacyi galinta ee Warbaahinta Qaranka Soomaaliyeed.

Ra’iisul Wasaare Xasan Cali Kheyre ayaa aad u amaanay hawlaha ka socda Wasaaradda Warfaafinta, isagoona bogadiyay in la sii dardar galiyo Wacyi galinta bulshada, Mudane Xasan Cali Kahyre ayaa sheegay in Xukuumadda ay si weyn u garab taagan tahay Warbaahinta Dowladda oo kaalin muhiim ah ka qaadaneysa Horumarka Dalka.

Ugu dambeyn Mudane Xasan Cali Kheyre ayaa sidoo kale kormeer ku tagay Wasaaradda Haweenka & Horumarinta Xaquuqul Insaanka oo xarunteeda ay ku dhex taalo Wasaaradda Warfaafinta, wuxuuna warbixin ku saabsan sida ay u socdaan howlaha Wasaardaasi ka dhageystay Wasiirka Haweenka, Marwo Deeqa Yaasiin, Raiisul Wasaaraha ayaa ku booriyay mas’uuliyiinta iyo shaqaaalaha Wasaaradahan in ay sii xoojiyaan howlaha ay u hayaan bulshada.

Xigasho SONNA
Halgan.net

Af-hayeenka Jubbaland C/naasir Seeraar Maax oo laga waraystay dagaalkii ka dhacay deegaanka Buulo Guduud.[Dhagayso]

Sun, 09/03/2017 - 18:57

Kismaayo:-Waxaa maanta ka dhacay deegaanka Buulo Guduud oo ilaa 30km dhinaca Waqooyi kaga beegan magaalada Kismaayo ee xarunta jubada hoose dagaal u dhexeeya Al-shabaab iyo ciidanka Jubbaland waxaan dagaalka maanta ka dhashay khasaaro iskugu jira dhimasho iyo dhaawac. Afhayeenka maamulka Jubbaland C/naasir seeraar maax ayaa sheegay in dagaalka ay uga dhinteen 7 askari 10 kalena ay uga dhaawac meen isagoo xusay in ciidamadood iska difaaceen weerarka uga yimid ururka Al-shabaab oo ahaa mid qorshaysan oo ay rabeen in ay ku qabsadaan saldhiga ay ciidanka Jubbaland ay ku lahayen deegaanka Buulo Guduud.

Hoos ka Dhagayso Af-hayeenka Maamulka Jubbaland Cabdinaasir Seeraar Maax.

Halkaan ka Dhagayso Mp3

 

 

A/cawaale
Halgan.net

Maxkamadda Ugu Sarreysa Kenya oo Amartay in Doorashada Dib loogu Celiyo

Fri, 09/01/2017 - 12:09

Maxkamadda ugu saraysa dalka Kenaya ayaa go’aamisay in lagu celiyo doorashadii dhawaan lagu soo gabogabeeyay Kenya ee guddiga doorashadu ay ku sheegeen in uu ku guulaystay madaxweynaha hadda talada haya ee Uhuru Kenyatta.

Maxkamadda ugu saraysa dalka ayaa sheegtay in guddiga doorashada ee Kenya uusan si hufan u qabanin hannaankii doorashada.

Sidaas dareedeedna guddiga doorashadu waxay waxba kama jiraan ku tilmaantay natiijadii ay dhawaan ku dhawaaqeen guddiga doorashada.

Afar ka mid ah lixdii garsoore ee dacwada qaadaysay ayaa go’aamiyay in aysan si hufan u dhicin doorashadii madaxweynenimadu sidaas daraadeedna waxay amartay in dib loogu noqdo.

Labo ka mid ah garsooreyaasha ayaa qaatay go’aan midkaas ka duwan, halka midkii todobaadna uu ka xannuunsanaa maalmihii u dambeeyay.

Maxkamaddu waxaa kale oo ay amartay in lixdan maalmood gudahood lagu qabto doorashada.  Taariikhda Kenya waa markii koobaad ee doorasho madaxweyne ay maxkamadi dib u celiso.

BBC Somalia
Halgan.net

Madaxweyne Ku-xigeenka Puntland oo shacabka Garoowe Kala Qaybgalay Salaada Ciida Adxaa. (Masawiro)

Fri, 09/01/2017 - 12:01

Madaxweyne Ku-xigeenka dawladda Puntland ahna kusimaha Madaxweynaha Eng. Cabdixakiin Xaaji Cabdullahi Cumar Camey ayaa maanta 01 September 2017 salaadda ciiddul adxaha la oogey shacabka caasimadda  Garoowe.

Salaadda ciiddul adxaha oo lagu tukadey garoonka kubadda cagta Mire Awaare ee magaalada garoowe ayaa waxaa Madaxweynaha halkaasi kula tukadey salaadda muuliyiin ka tirsan goleyaasha dawladda Puntland, saraakiil ka tirsan Madaxtooyada Puntland, isimo, waxgarad, siyaasiyiin iyo shacab weynaha magaalada Garoowe.

Kusimaah Madaxweynaha Eng. Camey ayaa ugu horayn hambalyo ku aadan farxadda munaasibadda ciiddul adxaha u diray ummadda Soomaaliyeed, gaar ahaan iyo guuda ahaanba shacabka reer Puntland, waxaana uu sigaara ula qaybsaday dareenka farxadda ciiddull adxaha ciidanka qalabka sida ee dawladda Puntland, isagoona xusay inay suura geliyeen amniga, kala danbaynta iyo xasiloonida Puntland.

Sidoo kale Madaxweyne Ku-xigeenka Puntland ayaa caadeeyey in maanta Puntland uu ka socdo kana hirgalay horumar lixaadle oo aanay jirin meel uu ka hirgay Soomaaliya, taasina ay suura geliyeen isku duubnida shacabka iyo dawladda Puntland.

Dhinaca kale, Madaxweyne Camey ayaa si qoto dheer uga hadlay lacagta shillin Soomaaliga, taas oo ay in muddo ah taagnayd hawsheedu, waxaana uu sheegay kusimaha Madaxweynuhu in aanay jirin dad reer Puntland ah oo ka cabanaya lacagta shillin Soomaaliga, isla markaana waxa uu xaqiijiyey in lacagtani tahay mid ay gobolada koonfureed ee Soomaaliya ka joojiyeen argagixisada Al-shacaab, isla mar ahaantaana waxa uu ugu baaqay dawladda Dhexe ee Soomaaliya iyo dawladdaha kale ee xunaha ka ah DFS ay ka gaadhaan arrintani xal lagu badbaadinayo lacagta shillin Soomaaliga laguna yaraynayo lacagta qalaad ee Dollar-ka.

Madaxweyne Ku-xigeenka Puntland ayaa xaqiijiyey in isaga aanay  ka iman amar lagu joojinayo lacagta shillin Soomaaliga ah,  hase yeeshee ay jirto digreeto Madaxweynaha dawladda Puntland soo saaray, taas oo lagu socodsiinaayo qaadashada lacagtaasi, laguna mamnuucayo lacagta xoosh ka ah amaba duugowdey  ee lagu soo daabulayo gawaadhida xamuulka, lagana keenayo gobolada koonfureed ee Soomaaliya, waxaana uu Madaxweyne camey xaqiiyeyn digreetada Madaxweynaha dawladda Puntland soo saaray ay tahay mid saxa oo u dan ah dawladda Puntland iyo shacabkeeda.

Madaxweyne Camey ayaa sidoo kale xusay in dawladdu gacanta ku dhigtay lacag tirro badan oo shillin Soomaali ah taaso oo ku rasaysan gawaadhida xamuulka, laguna hayo saldhigyada Booliska gobolada Puntland, waxaana uu shacabka Puntland u cadeeyey in dhowaan dawladdu ka yeelandoonto qorshe lagu joojinayo lacagtaasi, isla markaana waxa uu shacabka Puntland ugu baaqay inay isticmaalaan lacagtooda kuna xidhnaadaan bangiyada dawladda ee kuyaala magaala madax kasta ee gobol walba leeyahay.

[See image gallery at halgan.net]

Ugu danbayntii, Madaxweyne Ku-xigeenka Dawladda Puntland Eng. Cabdixakiin Xaaji Cabdullaahi Cumar Camey ayaa ugu baaqay ganacsatada reer Puntland, shaqaalaha iyo masuuliyiinta sar-sare ee dawladda inay iyagu ugu horeeyaan qaadashada lacagta Shillin Soomaaliga, waxaana uu sidoo kale ugu baaqay Dawladda Fadaraalka Soomaaliya inay soo faragashato wax ka qabashada dhibtaatada ka taagan lacagta ummadda Soomaaliyeed ee Shillin Soomaaliga ee laga keenayo gobolada koonfureed ee Soomaaliya.

=DHAMMAAD=

XAFIISKA, WARFAAFINTA, WACYI-GELINTA HIDDAHA IYO DHAQANKA EE MADAXTOOYADA DAWLADDA PUNTLAND.

Maamulka Halgan.net oo Hambalyada Munaasabadda Ciidul Adxaa u diray shacabka Soomaaliyeed

Fri, 09/01/2017 - 00:31

Muqdisho:-Maamulka Halgan.net iyo dhamaan wariyaash ka howl gala ayaa u diraya Hambalyo dhamaan umada Soomaaliyeed ee Muslinka ah Hambalyadaas oo ku aadan munaasabadda Ciidul Adxaa waxaana alle uga baryeynaa dhamaan shacabka Soomaaliyeed in alle ka aqbalo dhamaan acmaashii ay soo guteen gaar ahaan Acmaasha Xajka. Waxaa kale oo Umada Soomaaliyeed alle uga baryeynaa in uu ka dulqaado dhibaatada heysta uuna qalbigooda burcad isku mariyo .
تقبل الله منا ومنكم صالح الأعمال

Maamulka Halgan.net
Webmaster@halgan.net

Wasiirka Arrimaha Dastuurka ee Xukuumadda Federaalka Soomaaliya oo wareysi siiyay Warbaahinta Qaranka.[Video]

Fri, 09/01/2017 - 00:19

Muqdisho:-Wasiirka Arrimaha Dastuurka ee Xukuumadda Federaalka Soomaaliya Mudane Cabdiraxmaan Xoosh Jibriil ayaa Telefishinka Qaranka iyo Radio Muqdisho siiyay wareysi dhinacyo badan taabanayay oo ku saabsanaa waxqabadka Wasaaradda ee afartii bil ee la soo dhaafay, isaga oo ka jawaabay su’aallo ay weydiiyeen dadka Soomaaliyeed.

AVV Xoosh ayaa ugu horeeyn ka warbixiyay waxqabadka Wasaaradda isaga oo sheegay in hawl badan la qabtay. “Ugu horeeyn markii aan Wasaaradda la wareegnay waxa aan go’aansanay inaan Dastuurka dhameeystirno, kadib waxaan u baahanay inaan Qorshe sameeysano inaga oo ka talagelinayna qaybaha kala duwan ee bulshada, waxa aan la kulannay Wasiirada dawlad goboleedyada ee aan shaqo wadaaga nahay oo aan qaarkood ugu tagnay caasimadaha dawlad goboleedyada. Hadaba intaa kadib ayaan Qorshe sameeysanay waxa aana u gudbinay Ra’iisul Wasaaraha, waxa aana qaban-qaabineynaa shirweyne Qaran oo aan October qabaneyno si loogu ansixiyo Qorshaha Guud” ayuu yiri Wasiirka.

Dhanka kale, Wasiirka oo su’aal ahayd sida loo tixgelinayo rabitaanka dawlad goboleedyada ee ku aadan dib-u-eegista Dastuurka uga jawaabayay Dhageyste Axmed la yiraahdo oo Hargeysa Joogay ayaa yiri “Nidaamka aan qaadanay waa Federal, marnaba ma dhaceyso in Wasaaradda keligeed ay wax iska sameeyso, laakiin waxaan geleynaa sanad wadahadal ah oo aan ku kala cadeeyn doonno summadaha Federalka ee aan ku dhaqmi doonno; D/Goboleedyada door wayn ayey kulahaan doonaan dib-u-eegista Dastuurka”.

Ugu dambayn, Wasiirka ayaa sheegay in Wasaaradda ay ka go’antahay sameeynta wadatashiyo badan iyo xaqiijinta ka qaybgal loo dhanyahay si dastuurka loogu dhameeystiro labo sanno gudahood.

Hoos ka Daawo waraysiga uu Wasiirka Arrimaha Dastuurka ee Xukuumadda Federaalka Soomaaliya Mudane Cabdiraxmaan Xoosh Jibriil siyey Tv-ga DFS

—–DHAMAAD—–

Madaxwyenaha Dawladda Puntland oo Hambalyo Ku Aadan Ciidul Adxaha U Diray Ummadda Soomaliyeed.[Dhagayso]

Thu, 08/31/2017 - 21:00

Madaxweynaha Dawladda Puntland Dr. Cabdiweli Maxamed Cali Gaas oo ku gudajira gudashada acmaasha akhyriga ah ee Xajka  ayaa Hambalyo u diray ummadda Soomaaliyeed gaar ahaan shacabka Puntland iyo sidoo kale ciidamada qalabka sida ee dawladda Puntland munaasibadda ciidul Adxaha darteed.

Madaxweynaha  Puntland ayaa Alle ‘’SWC’’ u weydiiyey ummadda Soomaaliyeed gaar ahaan shacabka reer Puntland in ciidan ciideeda Alle  farxad, barwaaqo, Alla  ka-cabsi, amni, horumar iyo mid nimo ku gaadhsiiyo, waxaana uu Madaxweynuhu kula dardaarmay shacabka Soomaaliyeed inay Eebe Weyne ka baryaan inuu ka saaro dalkooda colaadda, abaarta iyo cadawga, quluub-toodana isu soo jeediyo oo mideeyo.

‘’ Ciid Mubaarak, Ciid Mubaarak, waxaan hambalyada ciidul Adxaha halkan uga hambalyay-nayaa shacabka Soomaaliyeed meelkastay joogaan, guud ahaan iyo gaar ahaanba shacab weynaha reer Puntland, waxaan Illahay uga rajaynayaa in iyaga caruurtooda, xaasaskooda, ehelkooda, qaraabadooda iyo meelkastay joogaanba dibad iyo guddaba ay ku ciidan ciid wanaagsan, sanadka sanadkiisana ay ku gaadhaan bash-bash iyo barqaaqo, nabadgelyo, midnimo iyo waddajir ’’ ayuu yiri Madaxweynaha Dawladda Puntland.

‘’ Illahay aan ka cabsoono, Illahay aan u toobadkeeno, Illahay aan barrino inuu dalkeena noo hagaajiyo, inuu noo nabadeeyo, inuu dhibta nagasaaro, inuu abaarta naga saaro, inuu colaadda nagasaaro, dabadeedna uu waddanka noo islaaxiyo, in Illahay dadka qulluubtooda isu soo jeediyo. waddaninimo, qaranimo, Soomaalinimo iyo horrumar in loo soo jeesto ayaan rajay nayaa’’ ayuu yiri Madaxweynaha Dawladda Puntland.

Madaxweynaha Dawladda Puntland ayaa sigaara ugu hambalyeey ugana mahad celiyey ciidamada qalabkasida ee reer Puntland, waxaana uu sheegay inay isaga iyo weftigiisuba ee gudanaya acmaasha khayriga ah ee xajka si gaara ugu soo ducayn doonaa ciidamada geesiyaasha ah ee reer Puntland.

‘’waxaan, sigaara rabaa halkan inaan uga mahad celiyo ciidamada qalabka sida ee reer Puntland oo noo ogolaaday inaanu ku xajino si nabad gelyo ah dalkana uga soo baxno una soo ducayno, dibad iyo gudana dalkooda ka difaacay cadawga, aad iyo aad bay u mahadsan yihiin, si gaarana waan ugu soo ducaynaynaa, Allena waxaan ka baryaynaa inuu noo siyaadiyo wanaagaa faraha badan ee uu nagu galaday” ayuu yiri Madaxweynaha dawladda Puntland.

Hoos ka Dhagayso Hambalayada ciida oo uu Madaxweyne Gaas u diray shacabka Soomaaliyeed

Halkaan ka Dhagayso Mp3

=DHAMMAAD=

XAFIISKA, WARFAAFINTA, WACYI-GELINTA HIDDAHA IYO DHAQANKA EE MADAXTOOYADA  DAWLADDA PUNTLAND.

Dowladda Ethiopia oo Xaqiijisay in Loo soo Dhiibay Cabdikariim Sheekh Muuse Qalbi-Dhagax.[Dhagayso]

Thu, 08/31/2017 - 20:45

Dowladda Ethiopia ayaa markii ugu horreysay xaqiijisay in dowladda Soomaaliya ay u soo gacan galisay sarkaal ka tirsanaa ururka ONLF oo toddobaadkii hore la sheegay in lagu qabtay magaalada Gaalkacyo. Dr. NEGERI Lencho, wasiirka arrimaha warbaahinta dowladda Ethiopia ayaa wareysi uu siiyay qeybta Afka Amxaariga ee idaacadda VOA ku sheegay in dowladda Somalia ay usoo gacan galisay Cabdikariim Sheekh Muuse oo ka tirsanaa ururka ONLF.

“Waxaan kuu xaqijiyay in Ethiopia loo soo gudbiyay sarkaalka ONLF ka tirsan, waxaana soo gudbinta ay ku dhacday heshiis nagala dhaxeeya dowladda Somalia. Mas’uulkan wuxuu ka tirsan yahay ururka ONLF oo ah urur argagixiso ah” ayuu yiri.

Warkan waxaa inoo faah-faahinaya Ibraahim Daandurey

Source:VOA

Madaxweynaha JFS oo Umada Soomaaliyeed ugu Hambalyeeyay Ciida Carafo

Thu, 08/31/2017 - 19:06

Madaxweynaha Soomaaliya mudane Maxamed Cabdullaahi Farmaajo ayaa shacabka Soomaaliyeed u diray hambalyada ciidda barakaysan ee Al-Adxaa.

Madaxweyne Famaajo waxa uu Alle uga rajeeyey shacabka Soomaaliyeed meel kasta ay ku sugan yihiin, caafimaad, horomar iyo barwaaqo, isagoo sheegay in arrimahaas lagu gaari karo xasilooni Amni oo si dhammaystiran uga hirgasha guud ahaan dalka.

“Maalmaha Ciidul Adxaaga waa maalmo kuwayn diinteena Islaamka, waa maalmo astaan u ah isjacaylka iyo walaaltinimada bulshadeenna. waa maalmo muujiya dareenka dhabta ah ee aynu isu qabno.”ayuu yiri Madaxweynuhu.

Madaxweynha waxa uu sii wayn ugu muujiyey dhambaalka hambalyada ciidda ee uu u diray shacabka Soomaaliyeed ahmiyadda ay nabadda iyo amnigu u leeyihiin umadda, maadaama haatan si wayn looga soo kabtay dhibkii bur burka.

Madaxweynaha ayaa yiri: “haddii aan anagu masuuliyiintii nahay waxaanu u istaagnay in aan ka shaqayno amniga, qof kasta oo Soomaali ahna waxaan ka doonaynaa in uu nagala shaqeeyo, maxaa yeelay cadawga aan leenahy hadda waa kooxaha nabad diidka ah oo u diiday Soomaaliya horomar”

Madaxweynaha JFS Maxamed Claahi Farmaajo oo Umada Soomaaliyeed ugu Hambalyeeyay Ciida Carafo

Ugu dambeyntii Madaxweyne Farmaajo waxa uu tilmaamay dadaalka dowladdu ay ugu jirto xasilinta dalka, isagoona rajo ka muujiyey in Soomaaliya oo Nabad dhamaystiran ay ka jirto lagu ciido sanadka soo socda.

—Dhamaad–

Shirka Golaha Xukuumadda Dawladda Puntland oo Todobaadkan Looga hadlay Amniga, Sicir Bararka Iyo Xal u Helidda Lacagta Shillin Soomaaliga.

Thu, 08/31/2017 - 19:05

Garoowe:-Madaxweyne Ku-xgeenka Dawladda Puntland ahna kusimaha Madaxweynaha Eng C/xakiin Xaaji Cabdullahi Cumar Camey, ayaa maanta shir-guddoomiyay shirka golaha xukuumadda Dawladda Puntland, waxaana looga hadlay arrimaha kala ah, xoojinta Amniga dalka, xaaladda sicir bararka iyo xal u helidda lacagta shillin Soomaaliga.

Madaxweyne kuxigeenka dawladda Puntland ayaa ugu horey ku booriyey dhammaan shacabka iyo masuuliyiinta dawladda Puntland in la illaaliyo oo laga wadda shaqeeyo xoojinta amniga, oo saldhig u ah xasiloonida iyo nabad gelyada dalka, isla markaana waxuu Madaxweyne Camey xusay in feejignaan gaara la sameeyo madaama lagu jiro u diyaar garawga ciidul Adxaha oo ay badi magaalooyinka waaweyn ee Puntland mashquul yihiin.

Shirka golaha xukuumadda dawladda Puntland ayaa sidoo kale looga hadlay arrimaha sicir bararka iyo xal u helidda lagacta shillin Soomaaliga, waxaana warbixino kusaabsan arrimahaasi laga dhegaystay Bangiga Dhexe ee Puntland, Wasaaradda Maaliyadda iyo guddiyo ku hawlanaa arrimahani ugub.

Dhinaca kale, Shirka golaha xukuumadda dawladda Puntland oo uu shir guddoominayey Madaxweyne Ku-xgeenka Dawladda Puntland ahna kusimaha Madaxweynaha Eng. Cabdixakiin Xaaji Cabdullahi Cumar Camey, ayaa dood dheer iyo gorfayn kadib xaqiijiyey in sida ugu macquulsan dawladdu usoo saari doonto qorsheyaal lagu xalindoono, lagagana hortegi doono dhibaatadaasi.

DHAMMAAD

XAFIISKA, WARFAAFINTA, WACYI-GELINTA HIDDAHA IYO DHAQANKA EE MADAXTOOYADA DAWLADDA PUNTLAND.

ONLF oo Xaqiijisay in DFS ay Itoobiya u gacan Galisay C/ Xakiin Sh Qalbi Dhagax

Wed, 08/30/2017 - 22:00

Gaalkacyo:-Jabhada ONLF ayaa waxay warmurtiyeed ka soo saartay sarkaal ka tirsan oo ay DFS u gacan galisay dowlada Itoobiya sarkaalka ayaa waxaa ay ciidamada NISA ee nabadsugida Soomaaliya ay ka qabteen deegaanada Galmudug

Sarkaalka loo gacan galiyey dalka Itoobiya ayaa waxaa lagu magacaabaa C/ Xakiin Sheekh Muuse (Qalbi Dhagax).

Jabhada ONLF ayaa sheegtay in C/ Xakiin Sheekh Muuse (Qalbi Dhagax) in Dowladda Soomaaliya ay si awood leh ugu wareejisay Dowladda Itoobiya, lana geeyay meel si bani’aadanimada ka baxsan Maxaabiista loo gula dhaqmo.

Wargeyska Ethiopian Observer ayaa xaqiijiyey in C/ Xakiin Sheekh Muuse uu gacanta u galay dowladda Itoobiya, waxaana diyaarad Millateri looga soo qaaday magaalada Muqdisho waxaana diyaarada ay ka soo dajisay C/xakiin qalbi Dhagax garoonka diyaaradaha ee magaalada Bishoftu ee dalka Itoobiya.

C/ Xakiin Sheekh Muuse (Qalbi Dhagax) ayaa waxaa uu ka mid ahaa saraakiisha halganka ONLF ku biiray 1984 waxaana 23 bishan ciidamada Galmudug ay ka qabteen gobalka Mudug iyada oo markii danbe ciidanka NISA ay geeyeen magaalada Muqdisho.

ONLF ayaa sheegtay in Madaxweynaha Soomaaliya, Maxamed Cabdulaahi Farmaajo, iyo Ra’iisul wasaaraha, Xasan Cali Khayre, La taliyaha Ammaanka Qaranka, Gen. Bashir Maxamed Jaamac Goobe, madaxa NISA Cabdullaahi Maxamed Cali “Sanbalolshe” ay Dembi Qaran oo ka dhan ah Ummadda Soomaaliyeed, ay galeen sidaasi darteedna wixii ka dhasha ay qaadi doonaan .

Halkan ka Akhriso warmurtiyeedkii ay ONLF ka soo saartay sarkaal ka tirsanaa oo DFS u gacan galisay dalka Itoobiya

A/Cawale
Halgan.net

Mu’assasada Minhaaj oo wacyigalin balaadhan oo dacwo ka samaysay Magaalada Burtinle.[Masawiro]

Wed, 08/30/2017 - 18:13

Burtinle:-Muassasada Minhaaj faraca gobolka Nugaal ayaa mudadii u dhaxaysay 23–26kii bishaan ka samaysay wacyigalin balaaran oo dacwo magaalada Burtinle, wacyigalintaas oo isugu jirtay:-
1) Siminaaro la siiyey dhalinyarada, macalimiinta, maamulayaasha iskuulada iyo hawlwadeenada dacwada.
2) Kalmado iyo muxaadarooyin loo jeediyey bulsho waynta oo ka baxayey masaajida, goobaha waxbarashada, idaacadaha iyo kuwo gaar u ah haweenka.
3) Kulamo wadatashi oo lala qaatay hawlwadeenada dacwada iyo waxgaradka deegaanka.

Dhinaca kale waxay culumaaudiinka iyo madaxda muassasadu kala qaybgaleen bulshada deegaanka xaflad heersare ah oo lagu daahfurayey machadka culuumta shareecada ee Alhidaaya.

[See image gallery at halgan.net]

Wacyigalinta oo xooga lagu saaray dhibaatooyinka Facebook-gga iyo qabyaalada ayey ka mahadceliyeen guud ahaan bulshada deegaanku, waxaana goaan lagu wada qaatay in xafiiska muasasada ee degmada si dhaqso ah loo furo.

Nuur Jaamac Aadan
Garoowe,Halgan,net

 

Madaxweyne Ku-xigeenka Dawladda Puntland oo Qasriga Madaxtooyada Garoowe ku qaabilay Wefti uu Hogaaminayo Safiir Ku-xigeenka Dalka Jarmalka ee Soomaaliya.[Masawiro]

Wed, 08/30/2017 - 17:49

Garoowe:-Madaxweyne ku-xigeenka Dawladda Puntland ahna kusimaha Madaxweynaha Eng. Cabdixakiin Xaaji Cabdullaahi Cumar Camey ayaa maanta 30 August 2017 qasriga Madax tooyada Garoowe ku qaabilay wefti uu hogaaminayo safiirka dalka Jarmalka u fadhiya Soomaaliya Mr. Markus Bollmohr.

Kulanka ayaa waxaa Madaxweyna kuwehelinaayey masuuliyiin ka tirsan goloyaasha dawladda Puntland iyo saraakiil ka tirsan Madaxtooyada Puntland, waxaana lagaga arrinsaday kulankani arrimo ay ka mid ahaayeen adkaynta xidhiidh ka labada dhinac iyo  mashaariicaha horumarineed ee dalka Jarmalku ka fulliyo Puntland.

Madaxweyne kuxigeenka Dawladda Puntland ahna kusimaha Madaxweynaha ayaa ugu horayn weftigani kusoo dhoweeyey qasriga Madaxtooyada Garoowe, waxaana uu kusimaha Madaxweynuhu tilmaamay inay tahay muhiim in layska kaashado sidii loo xoojin lahaa loona wanaajin lahaa xidhiidhka wanaagsan ee ka dhexeeya Puntland iyo dalka Jarmalka, taasi oo suura gelin karta in uu sii wanaagsanaado xidhiidhka wanaagsan ee ka dhexeeya hadda labada dhinac.

[See image gallery at halgan.net]

Sidoo kale Madaxweyne Camey ayaa weftiga uga warbixiyey mashaariicda horumarineed ee dalka jarmalku ka hirgeliyo Puntland muhiimadda ay u leeyihiin shacabka iyo dawladda Puntland, maadaama ay salka ku yahaan kobcinta arrimaha aasaasiga ah ee bulshada Puntland iyo tan Soomaaliyeedba, isla markaana waxa uu uga mahadceliyey dawladda Jarmalka mashaariicda horumarineed ee ay ka fullinayaan Puntland iyo guud ahaan Soomaaliya.

Safiir kuxigeenka dalka Jarmalka u fadhiya Soomaaliya ayaa dhankiisa cadeeyey inay diyaar u yihiin adkaynta iyo xoojinta xidhiidhka labada dhinac, waxaana uu sidoo kale hoosta ka xariiqay inay sii laban laabi doonaan mashaariicaha horumarineed ee dalka Jarmalku ka fulliyo Puntland, kuwaas oo uu sheegay inay kuyimaadeen iskaashiga iyo xidhiidhka wanaagsan ee labada dhinac.

=DHAMMAAD=

XAFIISKA, WARFAAFINTA, WACYI-GELINTA HIDDAHA IYO DHAQANKA EE MADAXTOOYADA DAWLADDA PUNTLAND.

Maamulka Gal-Mudug oo warsaxaafeed ka soo saaratay diyaaradaha sidda gargaarka bani’aadamnimo

Wed, 08/30/2017 - 17:35

Cadaado:-Maamulka Gal-Mudug ayaa waxa uu warsaxaafadeed ka soo saaray maanta in diyaaradaha gargaarka bani’aadamnimo sidda ee ka soo dega Garoomada diyaradaha ee Gal-Mudug aan wax lacag canshuur ah aan laga qaadi karin.

Hoos ka eeg warsaxaafeedka ka soo baxay wasaaradda gadiidka ee maamulka Gal-Mudug.

[See image gallery at halgan.net]

A/cawaale
Halgan.net

Madaxweyne Ku-xigeenka Puntland oo Garoowe ka Daah-Furay Mashruuca Xoojinta Caafimaadka Puntland ee 2017-2019.[Masawiro]

Wed, 08/30/2017 - 17:32

Garoowe:-Madaxweyne ku-xigeenka Dawladda Puntland ahna kusimaha Madaxweynaha Eng. Cabdixakiin Xaaji Cabdullahi Cumar Camey ayaa maanta 30 August 2017 magaalada Garoowe ka Daah-furay mashruuca xoojinta caafimaadka Puntland ee 2017-2019, waxaana mashruuca maalgeliyey Bangiga horumarinta Jamarlka.

Daahfurka Mashruucani balaadhan ayaa waxaa madaxweyne ku-xigeenka ahna kusimaha Madaxweynaha ku weheli naayey masuuliyiin ka tirsan goloyaasha dawladda Puntland, saraakiil ka tirsan Madaxtooyadda Puntland, wefti uu hogaaminayo safiir ku-xigeenka dalka Jarmalka u fadhiga Soomaaliya Mr. Markus Bollmohr iyo hay’addaha hawl-waddeenka la ah Wasaaradda Caafimaadka Puntland.

Madaxweyne Ku-xigeenka Dawladda Puntland ahna kusimaha Madaxweynaha Eng. C/xakiin Xaaji C/laahi Cumar Camey oo kahadlay daahfurka mashuucani ayaa sheegay in mashruucani yahay mid wax weyn ka taridoona hawlaha horumarineed ee caafimaadka Puntland, waxaana uu Madaxweyne ku-xigeenku sheegay in mashruucani isugu jiro hawlo caafimaad iyo dhismayaal ruggo caafimaad oo laga hirgelinayo labada gobol ee Mudug iyo Nugaal.

Sidoo kale kusimaha Madaxweynaha ayaa sheegay in mashariicdani tahay mid muhiima taasi oo ka kooban dhismayaal ruggo caafimaad, tayaynta shan cusbitaal oo kuyaala labada gobol ee Nugaal iyo Mudug, dhisme cusub oo xarun caafimaad ah oo laga hirgelindoono Garoowe iyo sidoo kale cusbitaalka weyn ee magaalada Gaalkacayo oo lagu kordhin doono dhimeyaal sucub iyo dib u dayactir.

Madaxweyne ku-xigeenka Dawladda Puntland ayaa sidoo kale sheegay in dib u habayn iyo dayactir lagu samayn doono 20 MCH iyo daboolidda hawlaha caafimaad ee aasaasiga ah ee labada gobol ee Nugaal iyo Mudug oo iyana kamidda qorshe yaasha lagaga faa’iidaysanayo mashruucani horumarinta caafimaadka Puntland ee 2017 -2019.

Dhinaca kale Kusimaha Madaxweynaha ayaa xaqiijiyey in mashaariicaha dalka Jarmalku ka fullinayo gudaha Puntland ay badan yihiin oo ay kamid tahay dhismaha waddada Gaalkacayo-Garoowe oo ay dawladda Jarmalku bixisay dhaqaalaha lagu hirgelinaayo waddadaasi.

[See image gallery at halgan.net]

Wasiirka Wasaaradda Caafimaadka Dawladda Puntland Cabdinaasir Cismaan Ciise ayaa dhankiisa ku dheeraaday muhiimadda ay mashaariicdani u leedahay Puntland iyo guud ahaan ummadda Soomaaliyeedba ee ku sugan guddaha Puntland, waxaana uu sidoo kale kahadlay waxqabadka balaadhan ee Wasaaradda Caafimaadku ka qabatay goboladda Puntland iyo kuwa hadda qorsha ugu jira inay fulliso oo dhamaantood waxtar buuxa u leh arrimaha caafimaadka ee Dawladda Puntland.

Ugu danbayn, Madaxweyne Ku-xigeenka Dawladda Puntland ahna kusimaha Madaxweynaha Eng. Cabdixakiin Xaaji Cabdullaahi Cumar Camey ayaa u mahadnaqay hawl-wadeenadda Waaradda caafimaadka iyo hay’addaha hawlwadeenka la ah Wasaaradda sida wanaagsan ee ay u dardar gelinayaan, isagana kaashanayaan socodsiinta mashaariicaha muhiim ka ah ee wax tarka u leh shacabka dawladda Puntland.

=DHAMMAAD=

XAFIISKA, WARFAAFINTA, WACYI-GELINTA, HIDDAHA IYO DHAQANKA EE MADAXTOOYADA DAWLADDA PUNTLAND.

Pages