News From Halgan Net

Subscribe to News From Halgan Net feed
Somali News
Updated: 57 min ago

Ururka Al-Ictisaam Bil Kitaabi Wassunnah oo bayaanka soo saaray Qaraxii Is goyska Zoobe

Wed, 11/01/2017 - 15:45

Muqdisho:-Ururka Al-Ictisaam Bil Kitaabi Wassunnah waxa uu uga tacsiyaynayaa dhamaan umadda Soomaaliyeed, musiibadii naxdinta lahayd ee ka dhacaday Sabtidi 24/muxaram/1439, 14/ 10/2017 Magaalada Moqdisho. Waxaanu Alle uga baryayaa naxariistii Janno inuu ka waraabiyo intii dhimatay cafiimaadna siiyo inta uu dhaawacu soo gaadhay.

Halkaan ka akhriiso bayaanka Ururka Al-Ictisaam Bil Kitaabi Wassunnah ka soo saareen qaraxii Is goyska Zoobe

A/cawaale
Halgan.net

 

Guddoomiye Jawaari oo Shirka Baarlamaanka Carabta uga qeyb galay Suudaan (Masawiro)

Tue, 10/31/2017 - 19:27

Shirka Baarlamaanka Carabta oo ay ku mideysan yihiin Baarlamaanada dalalka carabta ayaa markii ugu horeysay waxaa lagu qabtay Magaaladda Khartuum ee Xarunta wadanka Suudaan.

Shirkan oo uu si rasmi ah u furay Madaxweynaha Dalka Suudaan waxaa furitaankiisa ka soo qeyb galay Guddoomiyaha Baarlamaanka Carabta, Guddoomiyaha Golaha Shacabka ee Jamhuuriyadda Federaalka Soomaaliya Mudane Maxamed Sheekh Cismaan Jawaari, Guddoomiyaha Baarlamaanka Suudaan iyo dhamaan Guddoonka iyo Xildhibaanada xubnaha ka ah Baarlamaanka Carabta oo ay ku jiraan afarta xubnood ee golaha shacabka ee JFS U matalaya Baarlamaanka carabta.

Guddoomiyaha Baarlamaanka Carabta Mishaal bin Fahm Al-Salami oo ugu horeyn shirka ka hadlay ayaa u mahad celiyay dhamaan xubnaha ka socda dalalka carabta ee Baarlamaanka carabta.

Guddoomiyaha Baarlamaanka Dalka Suudaan Ibraahiim Axmed Cumar ayaa ugu horeyn u mahad celiyay wafdiga ka socda Jamhuuriyadda Soomaaliya oo uu ugu horeeyo Guddoomiyaha Golaha Shacabka Mudane Maxamed Sheekh Cusmaan Jawaari.

Madaxweynaha Dalka Suudaan Cumar Xasan Al Bashiir oo si rasmi ah shirka u furay ayaa ka hadlay muhiimada uu shirkan dalalka carabta u leeyahay.

[See image gallery at halgan.net]

Shirkan waxaa looga hadlay arrimo ay ka mid yihiin xaaladaha dalalka Yeman, Falastiin iyo cuna qabateyntii dhinaca dhaqaalaha ee dhawaan laga qaaaday dalkan Suudaan iyo sidoo kale dhaqaalaha iyo siyaasadda dalalka carabta.

——Dhamaad——

Madaxweynaha dowladda Federaalka Soomaaliya oo ka tacsiyeeyey geeridii Marxuum Xildhibaan Axmed Cashara

Mon, 10/30/2017 - 16:04

Muqdisho:-Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa tacsi u diray qoyska, ehelada iyo shacabka Soomaaliyeed ee uu ka geeriyooday, Allah ha u naxariistee, Marxuum Cawad Axmed Cashara oo xalay ku geeriyooday magaalada Toronto.

“Innaa Lillaahi wa Innaa Ileyhi Raajicuun. Anigoo ku hadlaya magaca Jamhuuriyadda Federaalka Soomaaliya, waxa aan idinla wadaagayaa tacsidan tiiraanyada leh. Marxuum Xildhibaan Cawad Axmed Cashara waxaa lagu xusuusan doonaa doowrkii wanaagsanaa iyo sida hufanaanta leh ee uu ugu adeegay shacabkiisa.”

Madaxwyne Farmaajo ayaa sheegay in Marxuumka oo ka mid ahaa Barlamaankii dowladdii kumeel gaarka ahayd, uu u soo shaqeeyey dalkiisa xilli adag isaga oo kaalin muhiim ah kulahaa sidii ay Soomaaliya dib ugu soo kaban lahayd.

“Alle ha u naxariisto Xildhibaanka, waxa uu inta ugu badan nolashiisa ku bixiyey ururinta taariikhda Soomaalida, isaga oo ka mid ah dadka sida gaarka ah isugu xilqaamay baarista iyo qorista taariikhdeenna soo jireenka ah.”

-DHAMMAAD-

Wixii faahfaahin ah, fadlan kala xiriir

Cabdinuur Maxamed Axmed
Agaasimaha Warfaafinta & Xiriirka Warbaahinta,
Xafiiska Madaxweynaha JFS
E-mail: media@presidency.gov.so

Wareysi: Nin la dilay Xubno Qoyskiisa oo ay ka mid yihiin Ilmo dhowr bilood jira ah iyo Hooyadiis.[Dhagayso]

Sun, 10/29/2017 - 21:06

Muqdisho:-Saraakiil dawladda Soomaaliya ah iyo hawlwadeennada caafimaadka ayaa sheegay in ugu yaraan 27 qof ay ku dhinteen weerarkii shalay ka dhacay magaalada Muqdishu 45 kalena ay ku dhaawacmeen. Dadka dhintay ayaa la sheegay inay u badan yihiin rayid shacab ah oo huteelkaais ku sugnaa iyo kuwo jidka marayey.

Waxaa kale oo la xaqiijiyey in dadka dhintay ay ku jiraan carruur qaarkood ay jiraan dhowr bilood.Shacabkaasi dhintay waxaa ka mid ah qoys ay ka geeri yoodeen afar xubnood oo iksugu jira afar carruur ah iyo ayeydood. Saddex qof oo kale oo isla qoyska ah ayaa dhaawacmay. Haddaba Haaruun Macruuf ayaa khadka telefoonka kula xidhiidhay aabaha wiil lix bil jir ah oo lagu dilay weerarkaas, waxaana uu ku dhintay canuggaas xabad ku dhacday hooyadiis oo dhabteeda uu ku sugnaa.

Ninkaasi waanu qarinay magiisa sababo dhinaca amniga ah.

Source:VOA

Sheekh Cali Wajiiz oo ka badbaaday weerarkii shalay Al-shabaab la beegsadeen Hotel Naasahablood 2.[Video]

Sun, 10/29/2017 - 20:20

Muqdisho:-Sh.Cali Maxamuud Xasan (Cali wajiiz) oo ka mid ah culimada Soomaaliyeed ee ku nool magaalada Muqdisho ayaa waxaa uu ka waramay qarax iyo weerar ay Al-shabaab shalay la beegsadeen Hotel Naasahablood 2 oo ay ku dhinteen 20 qof ayna ku dhaawac meen in ka badan 40 qof.Sh.Cali Maxamuud Xasan (Cali wajiiz) wuxuu sheegay in qaraxu dhacay isaga oo qolkiisa ku sugan ka dibna uu Sheekhu uu si deg deg ah uu qolkisa uu uga baxay una wareegay qayb kale oo Hotelka ka mid ah ka dibna uu qolkiisa soo xirtay uuna damiyey telefankiisii gacanta.

Sheekh Cali Maxamuud Xasan (Cali wajiiz) ayaa waxaa uu talo saartay alle waxaan uu tukaday salaad arrintiisana waxaa uu u bandhigay Alle isagoo qolkiisa ku sugnaa mudo dhan 8 saacadood oo xubnihii ka tirsanaa Al-shabaab ee soo galay gudaha Hotelka ay dilayeen cid walba oo ay arkaan balse alle waa ka bad baadiyey Sheekh Cali Maxamuud Xasan (Cali wajiiz) xili uu maqlayey codka dableyda Al-shabaab ee ku sugnaa meel aan ka fogayn.

Sh. Cali Maxamuud Xassan (Cali wajiiz) ayaa waxaa uu xusay in weerarki Al-shabaab ay ku qaadeen Hotel Naasahablood 2 uu ka bartay duruus waaweyn oo ay ka mid tahay in qof aysan tiisa gelin aysan cidna dili karin sidaas darteedna aan loo baahnayn in laga baqo ka hadalka fikriga Guracan ee Al-shabaab ee khilaafsan diinta Islaamka.

Sh. Cali Maxamuud Xassan (Cali wajiiz) ayaa ka sheekeeyey qaabka ay dadka u dilayeen haween iyo caruur ku suganaa Hotelka Naasahablood 2 waxaan uu Sheekhu ugu baaqay Madaxda dowladda Ferderfaalka Soomaliya iyo kuwa Maamul goboleedyada ka jira dalka in ay Alle ka baqaan oo ay ka fogaadan khilaafkooda ayna meel uga soo wada jeestaan ururka Al-shabaab.

Ma ah markii ugu horaysay oo culimada Soomaaliyeed ee waaweyn ay ka badbaadan weeraro ay Al-shabaab ku qaadeen Hotellada ku yaal Muqdisho waxaan ka xusi karnaa weerarkii Al-shabaab la beegsadeen Hotel Saxafi waxaa waqtigaas ku jirey Sh. Nuur Baaruud Gurxan oo Alle uu ka badbaadiyey weerarkaas.
Sidoo kale waxaa ay ururka Al-shabaab qarax ugu xiraan gaarigiisa gudoomiyaha culimada Soomaaliyeed Sh Dr.Bashiir Axmed Salaad oo si yaab leh uga badbaaday qarax uuna ka soo gaaray dhaawacyo fudud.

Hoos ka Daawo Sh.Cali Wajiis “Muddo labo saac ayaan aniga iy Al Shabaab wada nool

Hoos ka Daawo Sh.Bashiir Axmed Salaad ayaa sheegay in Al shabaab ay ka faaideystaan Khilaaf

Hoos ka Daawo Sh.Nuur Baaruud Gurxan oo ka hadlay weerarkii shalay kuna baaq dagaal ka dhan ah Al-shabaab

A/cawaale
Halgan.net

Madaxweynaha Dawladda Puntland oo Safaaradda Turkiga Muqdisho Kaga qayb Galay Dabaal degga Maalinta Xuriyaddooda.[Masawiro]

Sun, 10/29/2017 - 20:19

Muqdisho:-Madaxweynaha Dawladda Puntland Dr. Cabdiweli Maxamed Cali Gaas ayaa maanta gelinkii danbe 29 October 2017 safaaradda Turkiga ee Magaalada Muqdisho kaga qayb galay xafladda lagu maamuusayey maalinta xuriyadda dalkaasi oo ay kasoo wareegtey 94 sano kadib markii ay qateen xuriyaddooda October 29 1923-dii.

Xuska xafladda sanadguurada 94-aad ee dalka Turkiga ayaa waxaa sidoo kale ka qayb galay Ra’iisul Wasaaraha DFS Mudane. Xasan Cali Khayre, Madaxweynaha Jubbaland Axmed Maxamed Islaan, Madaxweynaha Koonfur Galbeed Shariif Xasan Shiikh Axmed, Madaxweynaha Hir-shabeelle Dr. Maxamed Cabdi Waare, siyaasiyiin, aqoon-yahano iyo marti sharaf kale.

Munaasibadda Xafladda lagu maamuusayey maalinta xuriyadda dalka Turkiga ayaa waxaa ka hadlay Ra’iisul Wasaaraha Soomaaliya Xasan Cali Khayre, waxaana uu shacabka iyo dawladda Turkiga ugu hambalyeeyey sanad guurada 94-aad ee dalkaasi, isla markaana waxa uu xusay in shacabka Soomaaliyeed iyo dawladdooduba ugu mahad naqayaan dawladda Turkiga garab istaaga ay markasta garab taagan yihiin, gaar ahaan wakhtiyada adag, isagoona xusay in Turkiga iyo Soomaaliya yihiin labo dal oo walaalo ah.

Safiirka Dalka Turkiga Mr. Oglan Bekar ayaa dhankiisa uga mahadnaqay Madaxda iyo shacabka Soomaaliyeed ee kasoo qayb galka xafladdani lagu maamuusayey sanadguurada 94-aad ee dalkaasi Turkiga, waxaana uu shacabka Soomaaliyeed uga tacsiyeeyey dadkii ku wax yeeloobey qaraxii maalinimadii shalay 28 October 2017 cadawgoodu ku waxyeeleeyay, isagoona cadeeyey in dalka Turkiga iyo DFS iska kaashan doonaan wax kasta oo lagu horumarinayo xidhiidhka labada dal.

=DHAMMAAD=

XAFIISKA, WARFAFINTA, WACYI-GELINTA, HIDDAHA IYO DHAQANKA EE MADAXTOOYADA DAWLADDA PUNTLAND.

Madaxweynaha JFS oo maanta furay shirka wadatashiga Amniga Qaran (Masawiro)

Sun, 10/29/2017 - 15:52

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa maanta si rasmi ah Xarunta Madaxtooyada uga furay shirka wadatashiga Dowladda Federaalka Soomaaliya iyo Madaxda Dowlad Goboleedyada.

Shirkan ayaa Madaxdu waxa ay ku gorfeynayaan arrimaha siyaasadda dalka, wada shaqeynta Dowladda Dhexe iyo Dowlad Goboleedyada, amniga iyo dagaalka ka dhanka ah argagixisada Alshabaab.

Wasiirka Arrimaha Gudaha, Federalka iyo Dib-u-heshiisiinta Mudane Cabdi Faarax Siciid ayaa sheegay in shirkan uu muhimad wayn u leeyahay dadka iyo dalka, maadaama uu ku soo beegmay xilli ay ka socdaan guud ahaan dalka dhaqdhaqaaqyo iyo abaabul dagaal oo laga xoraynayo argagixisada Alshabaab.

“Madaxweynayaasha Dowlad Goboleedyadu dhammaantood waa ay ajiibeen marti qaadkii Madaxweynahu uu u fidiyey 22ka bishaan si looga wada hadallo arrimaha taagan oo ay ugu hurrayso dagaalka ka dhanka ah alshabaab.”

[See image gallery at halgan.net]

Furitaanka shirkan ayaa waxaa ka qeybgaley Raiisul Wasaaraha Xukuumadda Federaalka Soomaaliya Mudane Xasan Cali Khayre, Madaxweynaha Puntland Mudane Cabdi Wali Maxamed Cali Gaas, Madaxweynaha Galmudug Axmed Ducaale Geelle Xaaf, Madaxweynaha Jubbaland Mudane Axmed Maxamed Islaam, Madaxweynaha Koonfur Galbeed Mudane Shariif Xasan Sheekh Aadam, Madaxweynaha Hirshabelle Mudane Maxaned Cabdi Waare iyo Guddoomiyaha Gobolka Benaadir Mudane Taabit Cabdi Maxamed.

—Dhamaad—-

Shirka Dowladda Dhexe iyo maamul goboleedyada dalka oo Muqdisho ka furmay

Sun, 10/29/2017 - 15:36

Muqdisho:-Waxaa goor dhow magaalada Muqdisho ka furmay shirka u dhaxeeya madaxda dowladda federaalka ah ee Soomaaliya iyo kuwa maamul goboleedyada dalka, kaasi oo uu shir gudoominayo madaxweynaha Jamhuuriyadda Soomaaliya Mudane Maxamed Cabdullaahi Farmaajo.

Shirka ayaa waxaa ka qeyb galaya madaxda dowlad goboleedyada, Guddoomiyaha Gobolka Banaadir iyo masuuliyiinta qaranka oo ay ugu horeeyaan Madaxweynaha Soomaaliya iyo Ra’iisul Wasaare Xasan Cali Kheyre.

Shirka ayaa inta uu socdo waxaa diiradda lagu saari doonaa wada shaqeynta dowladda Soomaaliya iyo dowlad goboleedyada iyo sida looga wada shaqeyn karo la dagaalanka Al-shabaab.

SONNA
Halgan.net

Golaha Wasiirada oo xilalkii ka qaaday Taliyaha Booliiska iyo Agaasimaha Nabad-Sugida

Sun, 10/29/2017 - 15:31

Shir aan caadi aheyn oo ay Golaha Wasiirada ee Xukuumada Dawladda Federaalka maanta yeesheen oo uu shir-guddoominayey Ra’iisul Wasaare ku xigeenka Xukuumada Mudane Mahdi Maxamed Guled (Khadar) ayaa looga hadlay arrimaha amniga iyo gaar ahaan qaraxii shalay ay kooxaha argagaxisadu ka fuliyeen Hotel Nasa Hablood 2 ee magaalada Muqdisho.

Ugu horreyn, Wasiirka Amniga Gudaha Mudane Maxamed Abukar Islow (Ducaale) ayaa golaha wasiirada siiyey warbixin la xiriirta dhacdadii Musiibada Qaran ee 14kii Oktoober iyo tii shalay 28ka Oktoober oo ay kooxaha argagaxisadu qarax iyo weerar ka fuliyeen hotel Nasa Hablood 2 ee Muqdisho.

Golaha Wasiirada ayaa ka tacsiyeeyey dhammaan dadkii ku geeriyooday Qaraxii argagaxisada ee shalay, una rejeeyey inta dhaawaca ah in EEBBE bogsiiyo. Golaha Wasiirada ayaa si kulul u cambaareeyey falka argagaxisada ah, isla markaasna ku ammaanay ciidamada Soomaaliyeed ee geesiyaasha ah sida ay u soo bad-baadiyeen dad badan.

Wasiirka Amniga ayaa sheegay in dhacdadii 14kii Oktoober 2017 loo qabtay dad gaaraya ilaa 5 qofood oo ay ku jiraan darawalkii gaariga Noha ee qarxay maalintaas iyo 2 damiin ka ahaa gaarigii ku qarxay isgoyska KM5 iyo shaqsi isaga isa soo dhiibay oo ay hay’adaha amnigu gacanta ku hayaan.

Wasiirka ayaa sidoo kale ka warbixiyey dhacdadii qaraxii hotel Nasa Hablood 2 oo uu sheegay inay ku geeriyoodeen 27 qof, isla markaasna dad badan laga soo bad-baadiyey hoteelka oo ay ciidamadu u gurmadeen. Wasiirka ayaa sheegay in 5 maleeshiyada Al-Shabaab ah ay weerarka qaraxa soo qaadaan iyadoo 3 ka mid ah gacanta lagu dhigay oo ay hay’adaha amniga su’aalo weydiinayaan.

Golaha ayaa dood dheer ka yeeshay arrimaha amniga iyo nabadeynta soona jeediyey tallooyin muhiim u ah hay’adaha amniga. Intaas ka dib ayaa Wasiiirka Amniga uu Golaha Wasiirada ka codsaday in xilalka laga qaado Taliyaha Booliiska iyo Agaasimaha Hay’ada Nabad-Sugida Qaranka, si loo helo isla xisaabtan dhab ah.

Golaha Wasiirada ayaa dood dheer ka dib ugu danbeyntii cod u qaaday oo ay xilalkii ka qaadeen Taliyaha Booliiska Abdixakiin Daahir Saciid (Saacid) iyo Agaasimaha Nabad-Sugida Qaranka Cabdullaahi Maxamed Cali (Sanbaloolshe).

—DHAMMAAD—-

Gudiga Gurmadka Mu’asasada Safa oo deeq lacag ah gaarsiiyey dadkii ku waxyeeloobay qaraxii Isgoyska Zoob.[Masawiro]

Sat, 10/28/2017 - 22:08

Muqdisho:-Mu’asasada Safa ee Dacwada & hormarinta ayaa maalintii Saddexaad qeybisey kaalmo lacageed oo Shirkada Amal & Jaaliyada Soomaaliyeed ee Sweden ka timid looguna tala galey Gurmadka Muusiibadii Soobe. Tiro 100 Qoys ayaa maanta ka faa’iideysatey kaalmada Gurmadka Musiibadii Soobe, waxaana qoyskiiba la siiyey sida kuwii horeba $300 oo loogu talo galey iney dabka ku sii shitaan. Kulanka waxaa goob joog ka ahaa xubno ka kala socdey Gudiga Gurmadka Qaran & Gudiga Mu’asasada Safa oo kala ah:-

– Maxamed Yuusuf Jaamac (Tigey), Gudoomiye ku xigeenka Gudiga Gurmadka Qaran.

– Sh. Maxamuud Sh. Axmed Abu Sheyba, Gudoomiyaha Gudiga Gurmadka ee Safa.

– Dr. Sh. Haaruun Sheikh.

– Sh. C/fataax Xasan Axmed.

– Sh. C/casiis Cali Xasan.

[See image gallery at halgan.net]

Kelmaha la jeediyay ayaa isugu jirey, tacsi, sabirsiin, mahadcelin iyo in gurmadka lasii wado lana xoojiyo si dadka gacantu u wada gaarto, mustaqbalka & aayaha Agoomaha & dadka nafoobeyna loo kaabo.

Muqdisho 8 Safar 1439
28 Oct 2017
وبالله التوفيق
Gudiga Gurmadka Mu’asasada Safa
ee Dacwada iyo Horumarinta .

Madaxweyne Farmaajo “Waxa aan Alle uga baryayaa in uu Janadiisa ku manaysto dadkii Soomaaliyeed ee lagu laayey weerarkan argagixiso”

Sat, 10/28/2017 - 22:07

Muqdisho:-Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa ka tacsiyeeynaaya muwaadiniintii ku geeriyooday weerarkii argagixisada ahaa ee lala beegsaday Hoteel Naaso hablood. Madaxweynahu waxa uu Alle uga baryey in uu naxariistiiisa Janno ka waraabiyo dadkii ku shahiiday weerarkaas arxan darrada ah.

“ Inaa Lilaahi wa inaa ilayhi raajicuun. Waxa aan Alle uga baryayaa in uu Janadiisa ku manaysto, dadkii Soomaaliyeed ee aan waxba galabsan ee lagu laayey weerarkaan. Intii dhaawacanta iyagana waxa aan ugu ducaynaynaa in Alle uu siiyo caafimaad deg-deg ah.”

Madaxweyne Farmaajo ayaa ku tilmaamay weerarkaan mid ay doonayso argagixisada Alshabaab in ay ku cabsi galiso shacabka Soomaaliyeed ee ku baraarugay musiibadii 14ka Oktoobar, taas oo horseedday midnimo iyo istaakulayn ay muujiyeen shacabku dal iyo dibadba.

“Waxaa cabsi galiyey dadkeenna midoobay ee is garab-istaagay xilligii adkaa iyaga oo muujinaya sida ay uga go’antahay in ay ka qayb qaataan abaabulka lagu nabadaynayo dalka.”

Madaxweynaha Jamhuuriyadda Federaalka Soomaaliya ayaa xaqiijiyey in falalka noocaan oo kale ah aysan marnaba niyad-jab ku noqonayn qorshayaasha iyo howlgallada dowladda ay kaga hortagayso dhibaatada ay ku hayaan shacabka argagixisada Alshabaab.

DHAMMAAD

Wixii faahfaahin ah, fadlan kala xiriir

Maxamuud Bashiir Jaamac
Xafiiska Warfaafinta & Xiriirka Warbaahinta Madaxtooyada JFS.
E-mail: Mbjaamac@gmail.com, media@presidency.gov.so

Ciidanka Amniga Puntland (PSF)iyo kuwa PMPF oo howl galo ka fuliyey Buuraha Calmadow.[Masawiro]

Sat, 10/28/2017 - 21:11

Boosaaso:-Ciidanka Amniga Puntland (PSF) iyo Ciidanka badda Puntland oo howl gal ka fuliyey si wada jir ah Buuraha Calmadow ayaa sheegtay in ay gacanta ku dhigeen 5 xubnood oo ka tirsan ururka Al-shabaab. Ciidamadaan PSF iyo kuwa PMPF oo is garabsanaya ayaa saaka waxaa ay howl gal ka fuliyeen deegaanka Dolqooxle oo hoostaga tuulada Afurur ee gobolka Sanaag waxaan Sarkaal u hadaly ciidanka howl gal fuliyey uu u sheegay saxaafadda in ay burburiyeen Saldhiga ay ciidanka Al-shabaab ay ku lahayeen deegaanka Dolqooxle.

Sarkaalka u hadlay Ciidanka Puntland ayaa sheegay in howl galka ay ka fuliyeen deegaanka Dolqooxle oo hoostaga tuulada Afurur ee gobolka Sanaag ay ka gaareen guulo waaweyn ayna sii wadi doonaa ilaa inta xoogga Al-shabaab ay ku jiraan Buuraha Calmadow.

Ma ah markii ugu horaysay oo dagaalo fool ka fol ah ay ku dhexmaraan deegaano ka tirsan Buuraha Calmodow ciidanka Puntland iyo ururka Al-shabaab waxaa ka dhashay khasaaro iskugu jira dhimasho iyo dhaawac.

[See image gallery at halgan.net]

Dhinaca kale ciidanka Amniga Puntland (PSF) ayaa maalmihii la soo dhaafay waxaa ay hawlgallo ka dhan Al Shabaab iyo Daacish ka wadeen gobolada Bari iyo Sanaag ee Puntland, gaar ahaan magaalooyinka Tasjiic iyo Geesoqabad ee gobolka Bari, iyagoona dadweynaha kula hadlay deegaanadaas waxaan ay ku booriyen in gacan iyo xogba la siiyo ciidamada PSF iyo kuwa PMPF ee Puntland

M_M_Deeq
Halgan.net

Madaxweynaha dawladda Puntland iyo Wefti uu hogaaminayo oo safar ugu Ambabaxay Muqdisho.[Masawiro]

Sat, 10/28/2017 - 19:58

Garoowe:-Maxweynaha Dawladda Puntland Dr. C/weli Maxamed Cali Gaas iyo wefti balaadhan oo uu hogaaminayo ayaa maanta oo ay taariikhdu tahay 28 october 2017 safar shaqo ugu ambabaxay magaalada Muqdisho ee caasimadda dawladda Federaalka ah ee Soomaaliya.

Madaxwaynaha iyo weftgiisa ayaa kahor intaanay ka anbabixin garoonka diyaaradaha magaalada Garoowe ee Kanooko ayaa waxaa kusii sagootiyay gudoomiyaha Baarlamaanka Puntland Axmed Cali Xaashi iyo madax katirsan golayaasha dawladda Puntland, saraakiiisha ciidamada iyo saraakiil katirsan madaxtooyada Dawladda Puntland.

Madaxwaynaha Dawladda Puntland ayaa magaalada Muqdisho u anbabaxay kadib markii uu marti qaad rasmi ah kahelay Madaxwaynaha Dawladda Federaalka ee Soomaliya Madaxwayne Farmaaajo, waxaana madaxwaynaha Dawladda Puntland safarkiisa kuwehelinayey Gudoomiye ku xigeenka koowaad ee Golaha Baarlamaanka Puntland Cabdixamiid Shiikh Cabdisalaan, Wasiiro, Xildhibaano iyo saraakiil katisan Madaxtooyada Dawladda Puntland .

Madaxwaynaha Dawladda Puntland Dr. Cabdiweli Maxamed ali Gaas oo kahor inta aanu anbabixin warbaahinta kula hadlay Garoonka diyaaradaha ayaa isaga oo kawarbixinaya safarkiisa maanta uu ugu anbabaxay Muqdisho waxaa uu yiri

”Waxaan maanta u anbabaxayaa Magaalada Muqdisho, Xamar oo aan kaga qayb gelayno shir ay isugu imanayaan Madaxda Federaalka iyo madaxda Dawladdaha Xubnaha ka ah Dawladda Federaalka oo lagaga hadlayo arimo kusaabsan Nabadgelyada, Amniga iyo Wada shaqaynta, shirkani waa shirkii uu kubaaqay Madaxwaynaha Dawladda Federaalka ee Soomaaliya Maxamed Cabdulaahi Farmaajo.

Waxaan rajaynayaa inshaa alaahu in shirkaasi guul kusoo dhammaado Afgarad, wanaag, horumar iyo wadajir Soomaaliyeedna uu kasoo baxo” 

[See image gallery at halgan.net]

 

Ugu danbayn, Madaxwaynaha Dawladda Puntland DR. Cabdiweli Maxamed Cali Gaas ayaa maalmahan fooda inaku soo haya kusugnaan doona magaalada Muqdisho, halkaas oo uu kaga qaybgeli doono shirka wadatashiga Madaxda Qaranka, shirkaas oo Madaxwaynaha Dawladda Federaalka soomaliya uu Gogoshiisa dhigay dhammaana ay kasoo qaybgeli doonaan Madaxda Maamul Goboleedyada Jubbaland, Koonfur Galbeed, Galmudug iyo Hirshabeele.

–DHAMMAAD–
XAFIISKA, WARFAAFINTA, WACYI-GELINTA, HIDDAHA IYO DHAQANKA EE MADAXTOOYADDA DAWLADDA PUNTLAND.

Kooxda Al-Shabaab oo galabta Qaraxyo kale ku laayey shacab magaalada Muqdisho

Sat, 10/28/2017 - 18:44

Wararka ka imaanaya magaalada Muqdisho ayaa sheegaya in galabta laba qarax oo is xiga ay ka kala dhaceen Hotelka Naasa-hablood 2 ee Degmada Xamar-weyne iyo agagaarka Taalada Daljirka-Dahsoon.

Weerarka Hotelka Naasa-hablood 2 ee Degmada Xamar-weyne ayaa waxaa loo isticmaalay gaari laga soo buuxiyey walxa qarxa waxaana ilaa haatan inta la xaqiijiyey ku dhintay in ka badan 10 qof oo rayid ah waxaana jira dhaawacyo intaas ka badan .Wararka qaar ayaa sheegaya in Koox Hubeysan ay Gudaha u galeen ugaleen Hotelka Naasa-hablood rasaasna ay socoto gudaha Hotelka

Qaraxa labaad ayaa waxaa isna uu ka dhacay agagaarka Taalada Daljirka-Dahsoon ilaa haatan lama oga Khasaaraha uu geystay qaraxa labaad.

Xili shacabka Soomaaliyeed ay ku jireen gurmadka dadkii ay Eheladooda ku xasuuqeen kooxda Al-Shabaab ee Isgoyska Soobe ayey maanta ka geysteen qaraxyo kale oo ay ku dhibaateynayaan shacabka Soomaaliyeed ee Muslinka ah.

A/Cawale
Halgan.net

Khudbadii Jimcaha Masjidka Abubakar Nairobi Sh Maxamed Cabdi Umal (Daawo)

Fri, 10/27/2017 - 23:19

Nairobi:-Waxaan idinka soo gudbineynaa Khudbadii Jimcaha Masjidka Abu Bakar ee magaalada Nairobi waxaana Khudbada jeediyey Sheekh Maxamed Cabdi Umal Xafidahulaah waxaana uu khudbadiisa Qur’aanka Macnihiisa oo lafahmo.

Hoos ka daawo Khudbadii Jimcaha ee Masjidka Abu Bakar Al-Sadiiq Sh Maxamed Cabdi Umal.

Salaf Media
Halgan.net

Khudbadii Jimacaha Ee Masaajidka Saalixyada ee Magaalada Burco Sh Dr Feysal Maxamed Cali (Daawo)

Fri, 10/27/2017 - 23:07

Waxaan idiin soo gudbineynaa Khudbadii Jimacaha ee Masaajidka Saalixyada ee magaalada Burco waxaana Khudbada jeediyey Sheekh Dr Faysal Maxmed Cali .Waxaana uu Khudbada Sheekh Feysal uga hadlay in wanaaga la isfaro xumaantana la iska reebo.

Hoos ka Daawo Khudbadii Masaajidka Saalixyada ee Magaalada Burco Sh Dr Feysal Maxamed Cali.

Shihaabu diin Burco
Halgan.net

Shirka Golaha Wasiirada oo diirada lagu saaray Masiibada Qaran, Geeridii Jeneral Maxamed Abshir Muse

Thu, 10/26/2017 - 17:00

Muqdisho:-Golaha Wasiirada ee Xukuumada Federaalka Soomaaliya ayaa maanta yeeshay kulankoodii caadiga ahaa oo uu shir-guddoominayey Ku-Simaha Ra’iisal Wasaaraha Xukuumada Mudane Mahdi Mohamed Guled (Khadar). Arrimaha diirada lagu saaray shirkan waxaa ka mid ahaa Masiibadii Qaran ee 14kii Oktoober 2017, Geeridii General Maxamed Abshir Muse, Geedisocodka Deyn-Cafiska iyo arrimo kale.

 Ugu horreyntii Ku-Simaha Ra’iisul Wasaaraha ayaa sheegay in Dhacdadii 14ka Oktoober ay aheyd dhacdo xannuun badan kana codsaday Guddiga Gurmadka Qaran inay warbixin ka siiyaan golaha wasiirada Masiibadii Qaran ee 14kii Oktoober 2017. Sidoo kale waxaa warbixin laga dhageystay Guddiga Dhalinyarada Is-xilqaamay ee Gurmad Qaran oo ka warbixiyey howlaha muhiimka ah oo ay qabtaan tan iyo 14kii Oktoober oo ay abaabuleen dhalinyarada dalka gudihiisa iyo dibadiisa, isla markaasna si hagar la’aan ah ugu gurmaday dadkii waxyeeladu soo gaartay.   Guddiga ayaa u mahadceliyey dhammaan cidwalba oo gurmadka ka qeyqaadatay gaar ahaan dhalinyarada, Guddoomiyaha Gooblka Benaadir, Bahda warbaahinta, gaar ahaan SNTV oo si toos ah bulshada uga soo tabineysey xarunta gurmadka. Sidoo kale waxaa la ammaanay doorka Soomaalinimada ah ee la muujiyey oo ay Dowlada Federaalka hormuud ka aheyd. Agaasimaha Socdaalka & Jinsiyadaha oo dhaawacyada u diyaariyey baasabooro lagu qaaday. Sidoo kale waxaa la ammaanay dhaqaale ururinta ka socota dalka iyo gudihiisa, gaar ahaan Boosaaso iyo Nairobi oo dhaqaale looga aruuriyey.

Wasiirka Arrimaha Dibedda iyo Sii Hayaha xilka Wasiirka Gaashaandhiga ayaa ka warbixiyey safarkii Madaxweynaha uu ku tagey Uganda, Ethiopia iyo Djibouti oo si guul ah ku soo dhammaaday, laguna heshiiyey in ciidamda Xooga Dalka iyo kuwa AMISOM ay si wadajir ah uga wada qeybqaataan dib u xoreynta dalka si kooxaha argagaxisada ah looga sifeeyo dalka oo dhan.

Wasiirka Maaliyada ayaa ka warbixiyey geedisocodka deyn-cafiska oo ay Dawladda Federaalka mudo kala shaqeyneysay hay’ada Lacagta Adduunka (IMF). Wasiirka Maaliyada iyo Wasiirka Kalluumeysiga ayaa ku qanciyey IMF in Somalia laga cafiyo deymaha si dalka looga hirgeliyo mashaariic horumarineed.

Wasiirka Boostada iyo Isgaarsiinta ayaa ka warbixiyey kulanka sanadlaha ah ee hay’ada Isgaarsiinta Adduunka (ITU) oo uu ka qeybgalay, iyadoo Somalia ay ka mid noqotay xubin buuxda oo leh codeyn. Sidoo kale wasiirka ayaa sheegay inuu xiriir wanaagsan la soo sameeyey wadamo badan.

Golaha Wasiirada ayaa tacsiyo qaran u diray shacabka Soomaaliyeed iyo qoyskii uu ka geeriyooday marxuum Jeneral Maxamed Abshir Muse oo ku geeriyooday dalka Mareykanka. Marxuumka ayaa ahaa Taliyihii ugu horreeyey ee Ciidanka Booliska Soomaaliyeed, kana mid ahaa xildhibaanadii Dawladii lagu soo yageleelay Carta, kana soo qeybqaatay xornimda dalka, isla markaasna ku guuleystay in Soomaaliya ay yeelatay Taliska Ciidanka Booliiska Soomaaliyeed oo ahaa ciidan dishibiliin leh, bulshada la shaqeeya, sugayna amniga iyo kala danbeynta dalka, caana ka ahaa Afrika. Dawladda Federaalka ayaa guddi u saareysa qabanqaabiyey baroordiiq sidii loogu sameyn lahaa oo loo xusi lahaa doorkiisii wadaninimada, xil-kasnimada, waaayo-aragnimada ee uu ku soo hoggaamiyey ciidanka Booliiska Soomaaliyeed.

Ugu danbeyntii Golaha Wasiirada ayaa ka hadlay casuumada uu Madaxweynaha Jamhuuriyada Federaalka Soomaaliya Mudane Maxamed Cabdullaahi Maxamed Farmaajo u fidiyey Madaxweynayaasha Dawlad Goboleedyada Puntland, GalMudug, HirShabelle, Koofur-Galbeed, Jubbaland iyo Guddoomiyaha Gobolka Benaadir oo lagu wado inuu shirkooda qabsoomo 28ka Oktoobar 2017. Xukuumada ayaa wada qabanqaabada shirkaas, oo looga hadli doono xoojinta midnimada iyo wadajirka ummadda Soomaaliyeed iyo sidii dalka loo gaarsiin lahaa doorashooyin hal-cod iyo hal-qof ah.

DHAMAAD

Wasaarada Warfaafinta, Dhaqanka & Dalxiiska

Madaxweynaha Dowladda Federaalka Soomaaliya oo ka Tacsiyeeyay Geerida Jenaraal Maxamed Abshir Muus

Thu, 10/26/2017 - 08:31

Muqdisho:- Madaxweynaha Jamhuuriyadda Federaalka Soomaaliya Mudane Maxamed Cabdullaahi Maxamed (Farmaajo) ayaa ka tacsiyeeyay geerida ku timid Janaraal Maxamed Abshir Muuse oo caawa ku geeriyooday dalka Mareykanka. “Aniga oo ku hadlaya magacayga iyo kan qaranka, waxaan tacsi tiiraanyo leh u dirayaa dhammaan shacabka Soomaaliyeed, gaar ahaan eheladii iyo qaraabadii uu ka baxay, Alle ha u naxariistee, Janaraal Maxamed Abshir Muuse.”

“Janaraalku waxa uu ahaa shakhsi karti, dhawrsanaan, daacadnimo iyo dal jacayl ku sifoobay. Waxaa lagu xasuustaa kaalintii uu ka geystay dhismaha Ciidanka Booliiska Soomaaliyeed oo muddo 10 sano ku dhaw uu hoggaaminayay.”

Waxaan Alle (S.W.T) uga baryayaa inuu naxariistii Janno ka waraabiyo, ehelkii iyo qoyskii uu ka baxayna sabar iyo iimaan haka siiyo. Aamiin”
إِنَّا لِلّهِ وَإِنَّـا إِلَيْهِ رَاجِعونَ

A/cawaale
Halgan.net

Pages